Իսլամ Քարիմովը հաղթել է Ուզբեկստանի նախագահական ընտրություններում՝ հավաքելով ձայների 90,39 տոկոսը

Աշխարհ 30 Մարտ, 2015 16:38

Ուզբեկստանի գործող նախագահ Իսլամ Քարիմովը հաղթանակ է տարել պետության ղեկավարի ընտրություններում՝ հավաքելով ձայների 90,39 տոկոսը: Այդ մասին, ինչպես տեղեկացնում է «Արմենպրես»-ը, մարտի 30-ին Տաշքենդում կայացած բրիֆինգի ժամանակ հայտնել է Կենտրոնական ընտրական հանձնաժողովի ղեկավար Միրզա-Ուլուգբեկ Աբդուսալոմովը:

«Քարիմովի օգտին ձայն է տվել 17,2 մլն մարդ կամ քվեարկությանը մասնակցած ընտրողների ընդհանուր թվի 90,39 տոկոսը»,- ընդգծել է նա: «Ուզբեկստանի Հանրապետության նախագահի ընտրությունների մասին» օրենքի 35-րդ հոդվածին համապատասխան, դա իրավունք է տալիս նրան համարել պետության ընտրված ղեկավար:

Ուզբեկստանի նախագահի ընտրություններն անցել են մրցակցության բացակայության պայմաններում: Այս եզրակացությանն է եկել ԵԱՀԿ-ի ժողովրդավարական ինստիտուտների և մարդու իրավունքների բյուրոյի դիտորդական առաքելությունը: Առաքելության բրիֆինգի ժամանակ հայտարարվել է, որ ընտրարշավը բնութագրվում էր «մրցակցության և քաղաքական հայացքների բացակայությամբ»: Նրա կարծիքով՝ «ընտրությունները դարձել են բավականին վերահսկվող քաղաքական գործընթաց և տեղ չեն թողել ընդդիմության համար»:

Իր հերթին, ինչպես նշում է ՏԱՍՍ-ը, ԱՊՀ-ի դիտորդների առաքելության ղեկավար, Համագործակցության գործադիր կոմիտեի նախագահ Սերգեյ Լեբեդևը մարտի 30-ի բրիֆինգի ժամանակ հայտարարել է, որ Ուզբեկստանի նախագահի մարտի 29-ի ընտրություններն անցել են ազատ մթնոլորտում և երկրի ընտրական օրենսդրությանը համապատասխան:

«Ընտրություններն ապահովել են քաղաքացիների ազատ կամաարտահայտումը և անցել են Սահմանադրությանը և Ուզբեկստանի մյուս օրենսդրական փաստաթղթերին լիովին համապատասխան»,- ընդգծել է Լեբեդևը, հավելելով, որ հանրապետության ընտրական օրենսդրությունը համապատասխանում է միջազգային իրավունքի հանրաճանաչ նորմերին: