Եմենում սաուդական օդանավերի ռմբակոծությունից կանայք և երեխաներ են զոհվել

Եմենի կենտրոնական Յարիմ շրջանում մարտի 31-ին սաուդական օդանավերի ռմբակոծության հետևանքով խաղաղ բնակիչներ են զոհվել, այդ թվում՝ կանայք և երեխաներ:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, նախնական տեղեկություններով զոհերի թիվը կազմել է 11 մարդ: Ռմբակոծության թիրախում են հայտնվել բենզալցակայանները: Նաև հարվածներ են ուղղվել Եմենի հարավում գտնվող Ջարբա թաղամասի ուղղությամբ:

ՄԱԿ-ը ստուգում է Սաուդյան Արաբիայի կողմից մարտի 30-ին փախստականների ճամբարի ուղղությամբ հասցված օդային հարվածների մասին տեղեկությունը: Այս մասին հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ֆարհան Հակը: Փախստականների հարցերով գերագույն հանձնակատարի պաշտոնական ներկայացուցիչ Մոգիբ Հասսանը նշել է, որ ռմբակոծության հետևանքով զոհվել են 15-20 մարդ: Մինչդեռ Եմենի առողջապահության նախարարությունը հայտարարել էր 55 զոհերի և 250 վիրավորների մասին:

Տեղեկություններ կան, որ չնայած օդային հարվածներին, բանակի ստորաբաժանումներին հաջողվել է հսկողություն հաստատել Ադենի միջազգային օդանավակայանի վրա: Ադենում շարունակվում են բախումները շիաների և նախագահ Աբդ Ռաբբո Մանսուր ալ Հադիի կողմնակիցների միջև:

Զոհվել են 40, վիրավորվել 250 մարդ:

«Վճռականության փոթորիկ» գործողությունները Սաուդյան Արաբիայի գլխավորությամբ սկսվել են մարտի 26-ի գիշերը: Սաուդյան Արաբիային աջակցում են Բահրեյնը, Կատարը, Քուվեյթը և ԱՄԷ-ն: Դաշինքին միացել են նաև Եգիպտոսը, Հորդանանը, Մարոկկոն, Պակիստանը և Սուդանը: Ռմբակոծության են ենթարկվել Եմենի բնակելի թաղամասերը, պետական հաստատություններ, կարևոր նշանակություն ունեցող օբյեկտներ: