Lufthansa-ն 275 մլն եվրո կվճարի A-320-ի աղետի հետևանքով զոհվածների ընտանիքներին

Աշխարհ 31 Մարտ, 2015 20:59

Lufthansa ավիաընկերությունը 275 մլն եվրո կվճարի Ֆրանսիայի հարավում Airbus A-320-ի աղետի հետևանքով զոհվածների ընտանիքներին: Այդ մասին, ինչպես տեղեկացնում է «Արմենպրես»-ը, հաղորդել է Bild գերմանական հրատարակությունը՝ հղում անելով իրազեկ աղբյուրի:

Նշվում է, որ այդ փոխհատուցումը գրեթե կրկնակի ավելի է այն գումարից, որը սովորաբար վճարվում է նման դեպքերում: Bild-ը նշում է, որ ավիաընկերությունը այդ կերպ փորձում է խուսափել անհատական հայցերից, քանի որ դրանց հարուցման դեպքում Lufthansa-ն հարկադրված կլինի ապացուցել, որ ինքը չէր կարող կանխել աղետը:

Lufthansa-ն փոխհատուցումների վերաբերյալ տեղեկատվությունն առայժմ չի մեկնաբանում:

Ավելի վաղ Lufthansa ավիափոխադրողի ներկայացուցիչները հայտնել են, որ Ֆրանսիայի իշխանություններն ընդունել են կործանված A320 ինքնաթիռում գտնվող ուղևորների ընտանիքների 325 անդամների: Խոսքն առավելապես վերաբերում է Գերմանիայից և Իսպանիայից զոհվածների ազգականներին, որոնց համար երկու հատուկ ինքնաթիռ է վարձակալվել Դյուսելդորֆում և Բարսելոնում: Սակայն կան նաև Արգենտինայից, Վենեսուելայից, Կոլումբիայից, Մեքսիկայից և Ճապոնիայից ընտանիքների ներկայացուցիչներ: Նրանք սկսել են Ֆրանսիա ժամանել դեռ մարտի 26-ին՝ սկզբում Մարսել, իսկ հետո նրանց տեղա փոխել են A320-ի կործանման վայրի մոտակայքում գտնվող Սեն լեզ Ալպ գյուղ:

Ընդհանուր առմամբ՝ ֆրանսիական Ալպերում կործանված ինքնաթիռում ուղևորներ կային մեկուկես տասնյակ պետություններից:

Մարտի 30-ին վթարի վայրում վերսկսվել են զոհվածների մարմինների մնացորդների և երկրորդ «սև արկղի» որոնումները, որից ստացվելիք տվյալները պետք է լրացնեն տեղի ունեցածի պատկերը:

Զոհված ուղևորների մերձավորների հետ զրուցել է Մարսելի դատախազ Բրիս Ռոբենը, որը տեղեկացրել է հետաքննության առաջին արդյունքների մասին: Ինքնաթիռի խցիկում խոսակցությունների՝ «սև արկղի» արած ձայնագրությունների վերլուծությունը ցույց է տալիս, որ 150 մարդու կյանք խլած ողբերգության են հանգեցրել երկրորդ օդաչուի՝ 28-ամյա Անդրեաս Լուբիցի միտումնավոր գործողությունները: Ուշագրավ է, որ նրա ծնողները նույնպես ժամանել են Ֆրանսիա, սակայն հենց սկզբից նրանք առանձնացվել են մնացած խմբից:

Germanwings ընկերության A320 մարդատար ինքնաթիռը, որը Բարսելոնից ուղևորվում էր Դյուսելդորֆ, մարտի 24-ին կործանվել է Ֆրանսիայի հարավ-արևելքում: Աղետը տեղի է ունեցել Վերին Պրովանսի Ալպերի դեպարտամենտի Տրուա-Էվեշե լեռնազանգվածի շրջանում՝ Դին լե Բեն բնակավայրից ոչ հեռու: Օդանավում եղել է 150 մարդ՝ 144 ուղևոր և անձնակազմի 6 անդամ, որոնք բոլորն էլ զոհվել են: