Աննա Դուրիցկայային ցույց կտան Նեմցովի սպանության գործով բոլոր կալանավորվածներին

Ընդդիմադիր գործիչ Բորիս Նեմցովի սպանության գործով հետաքննությունը մտադիր է ճանաչման ընթացակարգի կանչել հանցագործության գլխավոր վկային՝ Ուկրաինայի 23-ամյա քաղաքացի Աննա Դուրիցկայային: Այս մասին, ինչպես տեղեկացնում է «Արմենպրես»-ը, գրել է «Իզվեստիա» թերթը՝ վկայակոչելով իրավապահ մարմինների աղբյուրներ:

Քննիչների կարծիքով՝ աղջիկը կարող է հիշել այն մարդկանց, ովքեր, հնարավոր է, մինչև սպանությունը հետևել են Նեմցովին, քանի որ նրա հետ բավականին շատ ժամանակ է անցկացրել: Ճանաչման ընթացքում նրան ցույց կտան գործով բոլոր կալանավորվածներին: Ընթացակարգը կարող է անցնել ինչպես առերեսումով Մոսկվայում, այնպես էլ հեռակա Կիևում՝ լուսանկարներով:

Դուրիցկայային, որը Նեմցովի կողքին է եղել սպանության պահին, հարցաքննել են հանցագործությանը հաջորդած օրերին: Նա խոստացել է համագործակցել հետաքննության հետ, ինչից հետո քննիչները նրանից ստորագրություն են վերցրել տեղեկատվության չհրապարակման մասին և թույլ են տվել գնալու: Մարտի 2-ին փաստաբանի ուղեկցությամբ Դուրիցկայան վերադարձել է Ուկրաինա:

Նեմցովն սպանվել է փետրվարի լույս 28-ի գիշերը ՌԴ-ի մայրաքաղաքի կենտրոնի Բոլշոյ Մոսկվորեցկի կամրջին: Քաղաքական գործչին խոցել է չորս գնդակ, նա մահացել է տեղում: Այդ ժամանակ նրա հետ գտնվող Դուրիցկայան չի տուժել:

Նեմցովի սպանության կասկածանքով ձերբակալվել և այնուհետև կալանքի տակ են վերցվել Զաուր Դադաևը, Թամեռլան Էսկերխանովը, Անզոր և Շահիտ Գուբաշևները և Խամզատ Բախաևը: