A320 ինքնաթիռի աղետի պատճառները պարզելու համար ավելի շատ ժամանակ կպահանջվի. Lufthansa

Ավելի շատ ժամանակ է անհրաժեշտ՝ պարզելու, թե հատկապես ինչն է A320 ինքնաթիռի աղետին հանգեցրել Ֆրանսիական Ալպերում: Այդ մասին, ինչպես տեղեկացնում է «Արմենպրես»-ը, Սեն Լեզ Ալպ-ում հայտարարել է Lufthansa ընկերության ղեկավար Քարսթեն Շպորը: Նա Germanwings ավիափոխադրողի ղեկավար Թոմաս Վինկելմանի հետ միասին այցելել է А320 ինքնաթիռի կործմանման շրջան:

«Բավական շատ ժամանակ կպահանջվի A320 ինքնաթիռի աղետի պատճառները պարզելու համար»,- ասել է Շպորը: Ընդսմին տեղի ունեցածը նա անվանել է «ահավոր աղետ»: «Մենք սգում ենք այդ իրադարձությունների կապակցությամբ: Զոհվածների ազգականներին ու մերձավորներին մեր օգնությունը չի սահմանափակվի այն վճարումներով, որոնք արվել են վերջին օրերին»,- հավելել է նա:

«Ես զոհերի մերձավորներին ցանկանում եմ ասել, որ նրանց աջակցություն ենք ցուցաբերելու ոչ միայն այս շաբաթներին: Մենք ցնցված ենք այն բանից, ինչ տեղի ունեցավ մեր կոնցեռնի հետ: Մենք առաջվա պես կենտրոնանալու ենք անվտանգության հարցերի վրա: Ցավում ենք, որ այնպիսի սխալներ թույլ տրվեցին, որոնք երբևիցե անկարելի կլինի ուղղել»,- ասել է Շպորը:

Ինչպես նշում է ՏԱՍՍ-ը, Lufthansa-ի ղեկավարը նաև շնորհակալություն է հայտնել ֆրանսիական որոնողական խմբերին նրանց կատարած աշխատանքի համար: Շպորը և Վինկելմանն ուղղաթիռով շրջաթիռ են կատարել օդանավի ընկնելու վայրում, զրուցել տեղի իշխանությունների ներկայացուցիչների, փրկարարների հետ, ծաղկեպսակ դրել զոհվածների ժամանակավոր հուշարձանին և մեկ րոպե լռությամբ հարգել նրանց հիշատակը:

Germanwings ավիաընկերության A320 ինքնաթիռը, որը Բարսելոնից ուղևորվում էր Դյուսելդորֆ, կործանվել է մարտի 24-ին Ֆրանսիայի հարավ-արևելքում՝ Ալպերի դժվարամատչելի շրջանում: Աղետի հետևանքով զոհվել է 150 մարդ: Միակ հայտնաբերված «սև արկղի» ձայնագրությունը ցույց է տալիս, որ աղետը դարձել է երկրորդ օդաչուի՝ Գերմանիայի քաղաքացի Լուբիցի դիտավորյալ գործողությունների հետևանքը: