Ուկրաինայի հակամարտությունը գաղթական է դարձրել 1 միլիոն 700 հազար մարդու. հետազոտություն

Աշխարհ 1 Ապրիլ, 2015 19:41

Ուկրաինայի հակամարտությունն իրենից հետո թողել է 1 միլիոն 700 հազար գաղթականների, որոնցից շուրջ մեկ միլիոնը ներքին վերաբնակներ են, իսկ ավելի քան 700 հազարը գտնվում են հարևան երկրներում, առաջին, հերթին Բելառուսում և Ռուսաստանում: Այս մասին, ինչպես տեղեկացնում է «Արմենպրես»-ը, հաղորդել է «Կարիտաս» կաթոլիկական բարեգործական կազմակերպությունը:

Հինգ միլիոն մարդ մարդասիրական օգնության կարիք ունի, նրանցից 3,2 միլիոնը դասվում է ամենախոցելի կատեգորիաներին. դրանք տարեցներ են, հաշմանդամներ և երեխաներ, մեջբերում է Վատիկանի ռադիոն «Կարիտասի» հայտարարությունը:

«Աշխատավարձերի և թոշակների կրճատումը, որոնք ծառացել են այդ շրջանների (նկատի են առնվում Դոնեցկի և Լուգանսկի մարզերը) բնակիչների առջև, ինչպես նաև ենթակառուցվածքի, մասնավորապես, դպրոցների, հիվանդանոցների, մանկապարտեզների ավերումը, պարենի ձեռքբերման դժվարությունները և շարունակվող ռազմական գործողությունները՝ այս ամենն անտանելի իրավիճակ են ստեղծում շատ մարդկանց համար»,- հայտարարել է «Կարիտասի» միջազգային բաժանմունքի անհետաձգելի օգնության պատասխանատու Սյուզաննա Տկալեցը, որը նոր է վերադարձել այդ շրջաններ կատարած ուղե ւորությունից:

Ինչպես նշում է ՏԱՍՍ-ը, «Կարիտասի» միջազգային և եվրոպական ցանցը մի քանի բաժանմունքներ ունի Ուկրաինայում: Կազմակերպությունն օգնություն է ցույց տվել 50 հազար մարդու՝ մթերքով և առաջին անհրաժեշտության առարկաներով, նաև տրամադրվել է հոգեբանական օգնություն: Ընդամենը դրա համար «Կարիտասը» ծախսել է շուրջ 6 միլիոն երվո, նշված է հաղորդագրության մեջ:

Օգնություն է տրամադրվում նաև Բելառուսում և Ռուսաստանում գտնվող գաղթականներին: Շուրջ 550 ընտանիքներ «Կարիտասի» խնամքի տակ են գտնվում Ռուսաստանի Դոնի Ռոստով քաղաքում: Բելառուսում, որտեղ պաշտոնապես գրանցվել է 50 հազար գաղթական, կազմակերպությունն օգնություն է ցույց տալիս 1180 մարդու: