Բելառուսը երբեք Ռուսաստանի մաս չի դառնա. Լուկաշենկո

Բելառուսը երբեք Ռուսաստանի մաս չի դառնա, և ՌԴ-ի ղեկավարությունը երբեք նման հարց չի առաջադրել: Այդ մասին, ինչպես տեղեկացնում է «Արմենպրես»-ը, հանրապետության նախագահ Ալեքսանդր Լուկաշենկոն հայտարարել է Bloomberg գործակալությանը տված հարցազրույցում: Նրա խոսքը մեջբերում է ԲԵԼՏԱ-ն: «Մենք եղել ենք ու կանք ինքնիշխան, անկախ պետություն: Եվ այդպիսին էլ կմնանք»,- ասել է Բելառուսի ղեկավարը:

«Պուտինը երբեք իմ առջև հարց չի դրել, թե դուք մոռացեք ձեր անկախության մասին և դարձեք Ռուսաստանի Դաշնության նահանգը: Նա գիտի՝ ինչպես ես դրան կարձագանքեմ: Ուստի երբեք նման քննարկում չի եղել»,- հավելել է Լուկաշենկոն:

Նրա խոսքով՝ Ռուսաստանում շատ են քաղաքական այն գործիչները, ովքեր կայսերապաշտորեն են մտածում և Բելառուսը համարում են «հյուսիսարևմտյան երկրամաս»: «Դրան մենք կոնկրետ պատասխան ենք տալիս՝ մենք հյուսիսարևմտյան երկրամաս չենք լինի»,- ընդգծել է Բելառուսի նախագահը:

«Լուկաշենկոյի կարծիքով՝ Ռուսաստանը երբեք չի պատերազմի իր երկրի դեմ, որովհետև դրա համար պատճառ չկա: Բայց ընդսմին նա ընդգծել է, թե լիովին համաձայն է «ով սրով գա մեր դեմ, սրից էլ կընկնի» արտահայտությանը: «Մենք կպատերազմենք եվրոպացիների, ամերիկացիների, ռուսների կամ ուրիշների դեմ, եթե նրանք իրենց առջև նպատակ դնեն նվաճելու հողի այն կտորը, որի վրա պետք է ապրեն բելառուսները»,- հայտարարել է Ալեքսանդր Լուկանշենկոն:

Լուսանկարը' «Коммерсантъ»-ի