Թուրք բանվորները չեն կարողանում ստանալ իրենց փողերը

Ադրբեջանական գազը Թուրքիայով Եվրոպա փոխադրելու Անդրանատոլիական գազատարի (TANAP) շինարարությանը մասնակից Թուրքիայի պետական BOTASH ընկերության վարձած թուրքական AKYIL կապալառու ընկերությունն արդեն երկու ամիս է' չի վճարում իր բանվորների հասանելիք աշխատավարձը:

Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները' նշելով, որ բանվորները հայտարարել են գործադուլ սկսելու մասին:

Նշվում է, որ դրանք այն 20 բանվորներն են, ովքեր աշխատել են նաև TANAP-ի հիմնարկեքի արարողության համար Կարսում կառուցված ծածկի, երեք ուղղաթիռային հրապարակի և այլ շինարարություններում:

TANAP-ի հիմնարկեքի արարողությունն անցկացվել էր փետրվարի 17-ին, որին մասնակցել էին Թուրքիայի, Ադրբեջանի և Վրաստանի նախագահները:

Աշխատավարձ չստացած բանվորները բողոքի ակցիա են կազմակերպել Կարսում TANAP-ի շինարարության պատասխանատու ընկերության գրասենյակի առաջ: Նրանք հայտարարել են, որ իրենց ընտանիքները սոված են, իսկ ընկերության ղեկավարությունը չի վճարում իրենց հասանելիք փողերը: Նրանք նշել են, որ մինչև իրենց փողերը չստանան, ոչ մի աշխատանք չեն կատարելու:

Բանվորներից Իսա Քարիմիշը, դիմելով Թուրքիայի նախագահ Ռեջեփ Թայիփ Էրդողանին, դժգոհել է. «Մենք աղքատ և չքավոր մարդիկ ենք, արդեն տանը ուտելիք չունենք: Տվեք մեր փողերը: Գալիս արարողություններ եք անցկացնում, բայց չեք հետաքրքրվում, թե այդ բոլորը կառուցած մարդիկ ինչ վիճակում են»:

Բանվորները թուրքական ԶԼՄ-ներին պատմել են, որ ընկերությունը փետրվարին իրենց աշխատեցրել է 30 աստիճան ցրտի պայմաններում, և շաբաթական ընդամենը 50 լիրա կանխավճար է տվել, իրենք մնացած փողերը չեն կարողանում ստանալ: