Հայկական առևտրային ցանցը Երևանում համախմբել է տարբեր երկրների հայ գործարարներին

Շուրջ 14 երկրների հայկական առևտրաարդյունաբերական պալատներ ընդգրկող Հայկական առևտրային ցանցը (ՀԱՑ) Երևանում անցկացնում է 4-րդ Գլխավոր Ասամբլեայի նիստն ու 2-րդ գործարար ֆորումը:

Միջոցառմանը մասնակցում են արտասահմանում գործող հայկական առևտրաարդյունաբերական պալատների, գործարարների միությունների, Հայաստանի խոշոր առևտրային կազմակերպությունների ներկայացուցիչներ, նաև անհատ գործարարներ Հայաստանից, Արցախից ու այլ երկրներից:

ՀՀ սփյուռքի նախարար Հրանուշ Հակոբյանը լրագրողների հետ զրույցում նշեց, որ նախարարության գլխավոր խնդիրն է սփյուռքի համայնքներին համախմբել' ըստ մասնագիտությունների ու գործունեության ոլորտների: «Մասնագիտական ժողովների միջոցով փորձում ենք ամրապնդել մասնագիտական կապերը, փորձի փոխանակումը հզորացնել, կարողանալ հայրենիք ծրագրեր բերել: Առևտրաարդյունաբերական պալատներ գործում են տարբեր երկրներում, և մենք որոշեցինք համատեղ գործունեության ծրագրեր ու հրապարակ ստեղծել: «Համահայկական առևտրային ցանցը» մի կառույց է, որն ակտիվորեն աշխատանքներ է տանում տարբեր երկրների առևտրային պալատների հետ:

Այսօր 14 երկրներ անդամակցում են այս կառույցին, այսինք 'սա անհատական անդամակցություն չի ենթադրում, այլ ամբողջ պալատը դառնում է այս կառույցի անդամ: Ցանցը ստեղծվել ու կայացել է, անդամներն իրար ճանաչում են ու համատեղ ծրագրեր իրականացնում»,-ասաց Հրանուշ Հակոբյանը:

Նախարարը նշեց, որ համաժողովի ընթացքում ՀՀ պաշտոնյաները գործարարներին կներկայացնեն Հայաստանում ներդրումային, հարկային քաղաքականության առանձնահատկությունները, Փոքր ու միջին ձեռնարկություններին տրվող աջակցության ձևերը:

ՀՀ էկոնոմիկայի նախարարի առաջին տեղակալ Գարեգին Մելքոյանը համաժողովի մասնակիցներին ներկայացրեց Հայաստանի' Եվրասիական տնտեսական միությանն անդակցությամբ պայմանավորված արտահանումների և ներմուծումների պայմանները, ինչպես նաև ներդրումային քաղաքականության յուրահատկությունները: Նա խոսեց նաև Հայաստան-Եվրամիություն կապերի, ապրանքների արտահանման GSP+ արտոնյալ ռեժիմի, նաև Հայաստանում գործող ազատ առևտրային գոտիների մասին: «Ազատ տնտեսական գոտում, եթե որևէ ձեռնարկություն ստանում է գործունեություն ծավալելու լիազորագիր, ազատվում է ավելաց ված արժեքի հարկից, շահույթահարկից, վճարում է պակասեցված երկամտահարկ: Երրորդ երկրներից ապրանք ներմուծելիս, եթե կան մաքսատուրքեր, դրանք չի վճարում: Այս ձևաչափը, կարծում եմ, բիզնեսին պետք է հետաքրքրի»,-ընգծեց փոխանախարարը:

ՀՀ ֆինանսների նախարարի տեղակալ Արմեն Ալավերդյանն էլ խոսեց Հայաստանում վարվող հարկային քաղաքականության մասին: «Մենք ձեռնամուխ ենք եղել ստեղծելու Հարկային օրենսգիրք, որպեսզի տարբեր օրենքներում առկա մոտեցումները ներկայացվեն մեկ միասնական օրենսդրությամբ: Բավականին բարդ է դա իրագործելը, բայց աշխատանքներն սկսվել են: Այս տարվա դեկտեմբերին մենք կունենանք նախնական տարբերակը, որը հնարավոր կլինի ուղարկել Ազգային ժողով ու այնտեղ լայն քննարկումներ անցկացնել' ներգրավելով նաև հասարակական կազմակերպություններին»,-նշեց Արմեն Ալավերդյանը:

Փոխնախարարը հայտնեց, որ այս նպատակն իրագործելու համար ունեն միջազգային կառույցների աջակցությունն ու տարբեր զարգացած երկրների փորձը:

Հարկային ու մաքսային ոլորտներում առկա կնճռոտ հարցերը պետք է լուծում ստանան նշյալ օրենսգրքում: Դրանում պետք է արտացոլվեն նաև վարչարարական գործընթացները նկարագրող դրույթները»,-տեղեկացրեց Ֆինանսների փոխնախարարը:

Նա շեշտեց էլեկտրոնային կառավարման համակարգի գործունեության կարևորությունը' ավելացնելով, որ առաջիկա տարիներին անցում է կատարվելու 100 տոկոս էլեկտրոնայնացման, որպեսզի լիովին բացառվեն դեմ առ դեմ շփումները: