ՄԽ համանախագահները հայկական ու ադրբեջանական կողմերի հետ ԼՂ հիմնահարցը կքննարկեն Նյու Յորքում

ԵԱՀԿ Մինսկի խմբի համանախագահներ Ջեյմս Ուորլիքը (ԱՄՆ), Իգոր Պոպովը (Ռուսաստան) և Պիեր Անդրյուն (Ֆրանսիա) առաջիկայում կարող են այցելել Լեռնային Ղարաբաղ: Այդուհանդերձ, դեռևս այցի ժամկետներ նախանշված չեն: Այս մասին Interfax-ին տված հարցազրույցում ասել է Մինսկի խմբի ԱՄՆ համանախագահ Ջեյմս Ուորլիքը, ով օրերս ԼՂ հիմնախնդրի կարգավորման թեմայով քննարկումների համար մյուս համանախագահների հետ Մոսկվայում հանդիպել է ՌԴ արտաքին գործերի նախարար Սերգեյ Լավրովի հետ:

«Հակամարտությունն արդեն շատ երկար է ձգվում, ավելի քան 20 տարվա ընթացքում չափազանց շատ մարդ է մահացել: Հակամարտությունը կարող է կարգավորվել: Մենք ունենք կարգավորման պայմաններ, և դրանք հայտնի են: Մեզ համար իդեալական կարգավորումը ենթադրում է հաղթողների ու պարտվողների բացակայություն, այն պետք է ձեռնտու լինի երկու կողմերին էլ»,- նշել է Ուորլիքը' ընդգծելով, որ խնդիրը պետք է կարգավորել խաղաղ ճանապարհով. դրանից օգուտ կստանան տարածաշրջանի բոլոր բնակիչները:

Անդրադառնալով հնարավոր նոր հանդիպման կազմակերպմանը' Ուորլիքն ասել է, որ ծրագրեր կան, սակայն չկա հստակություն: «Մենք ցանկանում ենք նախագահների նոր հանդիպում, սակայն դեռևս չկա հստակություն ոչ հանդիպման ժամանակի, ոչ էլ վայրի վերաբերյալ: Որպես համանախագահներ' մենք կհանդիպենք արտգործնախարարների հետ, որպեսզի դնենք մյուս գագաթնաժողովի հիմնաքարը: Հուսով ենք՝ երկու կողմերի արտգործնախարարներին էլ երկու շաբաթ անց տեսնել Նյու Յորքում, որպեսզի ՄԱԿ-ի Գլխավոր ասամբլեայի շրջանակում քննարկենք հետագա քայլերը: Կցանկանայինք հուսալ, որ այնտեղ կկայանա նաև երկու նախագահների հանդիպումը»,- ասել է Ուորլիքը: