Գիտնականները հույս չունեն, որ առաջիկայում գիտությունը Հայաստանում կկարևորվի

Այսօր Հայելի ակումբի հյուրերն էին ակադեմիկոս Էդուարդ Ղազարյանը և Հայկական վիրտուալ աստղադիտարանի տնօրեն Արեգ Միքայելյանը, որոնք անդրադարձան Հայաստանում գիտական ոլորտի ներկա վիճակին և խոսեցին, թե ինչ նոր սպասումներ և պահանջներ ունեն գիտնականները նոր ԱԺ-ից և կառավարությունից:

Ակադեմիկոսի կարծիքով, առկա են մի շարք խնդիրներ, որոնցից առաջինը գիտության ֆինանսավորման խնդիրն է, աշխատանքային բարենպաստ պայմանների և միջազգային կոնֆերանսների մասնակցության հնարավորության բացակայությունը: Անվիճելի է, որ գիտական սարքավորումների առկայությունը տալիս է արդյունավետ աշխատանքի հնարավորություն, իսկ Հայաստանում գիտական սարքավորումները հնամաշ են և պիտանի չեն շահագործման համար:

Էդուարդ Ղազարյանը մատնանշեց մի ցավալի փաստ ևս. ակադեմիական համակարգում աշխատողների միջին աշխատավարձը 60000-70000 դրամ է: Անշուշտ, դա վիրավորական է այն գիտնականի համար, որի ուսին է դրված երկրի` ընդմիշտ հետամնաց երկրների շարքին դասվելու կամ չդասվելու պատասխանատվությունը: Այսպիսով, ունենալով հրաշալի մասնագետներ, ՀՀ կառավարությունը նպաստում է միայն կադրերի արտահոսքին: Մասնագետները գտնում են բարձր վարձատրվող աշխատատանք առաջատար միջազգային կենտրոններում և ընդմիշտ հեռանում Հայաստանից:

Բանախոսները դրական առաջընթաց են համարում ՀՀ նախագահի կողմից կյանքի կոչած բնակարանաշինության ծրագիրը, որը թույլ է տալիս գիտնականներին բնակարան ձեռք բերել շուկայականից ավելի ցածր գնով:

Արեգ Միքայելյանը հղում արեց անցյալ տարի Ծաղկաձորում տարբեր կուսակցության ներկայացուցիչիների կողմից հնչեցված հայտարարություններին ՀՆԱ-ի տոկոսով գիտության բաժինը 1.5-ով բարձրացնելու վերաբերյալ, ինչը վեցապասիկ ավելի է, քան հիմա: Աստղադիտարանի տնօրենի խոսքերով` եթե նորընտիր Կառավարությունը գոնե կրկնակի ավելացնի գիտությանը տրվող ֆինանսավորումը, ապա առաջընթացը տեսանալի կդառնա: Միևնույն ժամանակ, սակայն, գիտնականները հույս անգամ չունեն, թե առաջիկայում Հայաստանում գիտությունը կկարևորվի: