Կյանքից հեռացել է ֆրանսիացի կինոդերասանուհի Ստեֆան Օդրանը

85 տարեկան հասակում կյանքից հեռացել է ֆրանսիացի կինոդերասանուհի Ստեֆան Օդրանը (իսկական անունը՝ Կոլետ Դաշեւիլ):Մարտի 27-ին AFP գործակալությանը հայտնել է դերասանուհու որդին՝ Տոմա Շաբրոլը: Նշվում է, դերասանուհին վախճանվել է «հիվանդության հետեւանքներից»:

Ստեֆան Օդրանը դերասանական կարիերան սկսել է 1950-ական թվականներին Փարիզի թատրոններում ունեցած ելույթներով: Կինոէկրանին նա երկրորդ պլանի ոչ մեծ դերերով դեբյուտել է ֆրանսիական նոր ալիքի ռեժիսորների ֆիլմերում: Նրան ճանաչում է բերել Կլոդ Շաբրոլի հետ համագործակցությունը, որը հետագայում դարձավ նրա ամուսինը: Նրանց առաջին համատեղ աշխատանքը դարձել է «Զարմիկները» ֆիլմը (1959 թ.), որտեղ Օդրանը խաղացել է էպիզոդիկ դերերից մեկը: Հետագայում դերասանուհին դարձել է Շաբրոլի գլխավոր մուսան, որի ֆիլմերում նա կատարում էր գլխավոր դերեր: Այդ աշխատանքներն Օդրանին ճանաչում բերեցին Ֆրանսիայում եւ նրա սահմաններից դուրս:

Դերասանուհու կարիերայի ծաղկման ժամանակաշրջանը 1970-ական թվականներն էին, երբ նա աչքի ընկավ այնպիսի ֆիլմերի մասնակցությամբ, ինչպիսիք են «Մսագործը» (1970 թ.) եւ «Արյունոտ հարսանիքը (1973 թ.) կինոնկարները: Նա համագործակցել է նաեւ իսպանացի ռեժիսոր Լուիս Բունյուելի հետ: Նրա «Բուրժուազիայի համեստ հմայքը» ֆիլմում աշխատանքի համար Օդրանը բրիտանական BAFTA հեղինակավոր մրցանակի է արժանացել որպես 1973 թվականի լավագույն դերասանուհի: Օդրանի ձեռքբերումների շարքում է նաեւ 1978 թվականի «Սեզար» գլխավոր ֆրանսիական կինոմրցանակը «Վիոլետա Նոզիեր» (1978 թ.) կինոնկարում երկրորդ պլանի լավագույն դերի համար, հաղորդել է ՏԱՍՍ-ը: