Օրակարգը Սահմանադրության հետկանչն է. Ազատ Արշակյան (տեսանյութ)

Գերագույն խորհրդի պատգամավոր Ազատ Արշակյանն այսօր, լրագրողների հետ զրույցում խոսելով այս օրերին քաղաքական ուժերի կողմից ընդդեմ Սերժ Սարգսյանի իշխանավարման երկարացման պայքարի մասին՝ նկատեց՝ իշխանությունում փոփոխություն կատարելու ձևը Սահմանադրությունում փոփոխություններ կատարելն է: 

«Ազգային ժողովի լեգիտիմության հարցը պետք է դնել: Օրակարգը Սահմանադրության հետկանչն է, դա է Սահմանադրությունում փոփոխություններ կատարելու ձևը: Պետք է օրինական ճանապարհով հավաքել 200 հազար ձայն և իշխանությունում փոփոխություններ կատարել»,-նշեց Արշակյանը:

Արշակյանի խոսքով՝ ընդդիմադիր ուժերի պայքարը պետք է լինի ոչ թե անձի, այլ կոնկրետ ուժի դեմ. «Անձնավորելը կոպիտ սխալ է: Պետք է պայքարել ոչ թե Սերժ Սարգսյանի դեմ ու անընդհատ հիշեցնել, թե ինչ խոստումեր է նա տվել, ինչ է պարտավորվել և ինչ կանի: Դա, իհարկե, հետաքրքիր է, բայց քաղաքականության համար ավելի կարևոր է Հանրապետական կուսակցության կուրսը, քանի որ իշխողը հենց այդ կուսակցությունն է»,-ասաց նա:

Նրա կարծիքով՝ ՀՀ-ում այսօր ինչ որ տեղի է ունենում՝ բխում է Հայաստանի նոր կարգավիճակից՝ կապված 2013թ. սեպտեմբերի 3-ից Եվրասիական տնտեսական միությանը ՀՀ անդամակցությունից. «Եթե դրանից առաջ սոցիալիստական հանրապետություն էինք, ապա հիմա Հայաստանը բուֆերային զոնա է, որտեղ տնտեսություն, արդյունաբերություն, մշակույթ չի զարգանա: Այդ իմաստով, հետևաբար, կլինի և՛ արտագաղթ, և՛ սոցիալական ընկճվածություն, և՛ մշակույթի անկում»,- նկատեց Արշակյանը: