Խաշմանյանը հեռացել է«Ալաշկերտ»-ից. թիմը նոր գլխավոր մարզիչ ունի

ՀՀ Բարձրագույն խմբի առաջնության 20-րդ տուրի «Ալաշկերտ»—«Գանձասար-Կապան» (0:1) խաղից հետո տեղի ունեցած ժողովի ընթացքում «Ալաշկերտի» գլխավոր մարզիչ Աբրահամ Խաշմանյանը հրաժարական է ներկայացրել, որն ընդունվել է ակումբի հիմնադիր-նախագահ Բագրատ Նավոյանի կողմից: Այս մասին տեղեկացնում է ակումբի մամուլի ծառայությունը:

«Ալաշկերտ» ֆուտբոլային ակումբը շնորհակալություն է հայտնում Աբրահամ Խաշմանյանին, ում գլխավորությամբ մեր ակումբը մեծ հաջողություններ արձանագրեց ինչպես Հայաստանում, այնպես էլ Եվրոպական մրցասպարեզում` երկու տարի անընդմեջ հաղթելով Հայաստանի առաջնությունում, դառնալով Հայաստանի Սուպերգավաթակիր և երեք տարի անընդմեջ հաղթահարելով եվրոպական ակումբային մրցաշարերի որակավորման առաջին փուլը: Ակումբի ղեկավարությունը հաջողություն է մաղթում Աբրահամ Խաշմանյանին հետագա կարիերայում:

«Ալաշկերտ»-ի գլխավոր մարզիչ է նշանակվել անվանի մարզիչ Վարուժան Սուքիասյանը, ով վաղվանից կղեկավարի մեր թիմի մարզումները: «Ալաշկերտ»-ում Սուքիասյանին կօգնի Կարեն Բարսեղյանը:

Վարուժան Սուքիասյանը տարբեր տարիներին գլխավորել է ՀՀ ազգային և երիտասարդական հավաքականները, Բեյրութի «Հոմենմենը», ինչպես նաև` «Արարատ»-ը, «Լոռի»-ն, «Բանանց»-ը, «Վան»-ը, «Կոտայք»-ը, «Ցեմենտ»-ը, «Արաքս»-ը, «Սպարտակ»-ը և «Իմպուլս»-ը:

Սուքիասյանի գլխավորությամբ «Արարատ»-ը դարձավ 2008 թ. ՀՀ Գավաթակիր և առաջնության արծաթե մեդալակիր: «Բանանց»-ի հետ Սուքիասյանը նվաճել է ՀՀ Գավաթը, առաջնության արծաթե և բրոնզե մեդալները, «Ցեմենտ»-ի հետ երկու անգամ հաղթել է Գավաթի խաղարկությունում, մեկական անգամ նվաճել է առաջնության ոսկե և բրոնզե մեդալները: «Արաքս»-ը փորձառու մարզչի օրոք նույնպես նվաճել է չեմպիոնական տիտղոսը:

Կարեն Բարսեղյանը գլխավորել է «Ուլիս»-ը և Հայաստանի երիտասարդական հավաքականը, աշխատել է «Արարատ»-ում, «Ալաշկերտ»-ում, Հայաստանի ազգային հավաքականում: Բարսեղյանի նախորդ ակումբը «Գանձասար-Կապան»-ն էր, որի գլխավոր մարզչի պաշտոնը նա լքեց օրեր առաջ: