Սիրիայի տարածքում քաղաքական առևտուր են անում Թրամփը, Պուտինն ու Էրդողանը

Այս պահին Սիրիայում ընթացող ռազմական գործողությունների ելքը կախված է նրանից, թե ամերիկյան կողմն ինչպես կորոշի կիսել Աֆրինը, քանի որ ակնհայտ է, որ Սիրիայի տարածքում հստակ քաղաքական առևտուր  է ընթանում և հիմնական խաղացողներն են ԱՄՆ-ն, Ռուսաստանը և Թուրքիան:

Այս մասին նշեց թուրքագետ Տարոն Հովհաննիսյանը և նշեց, որ Սիրիայում ցանկացած տարածքի գրավման մասին խոսելիս նախ պետք է հիշել, թե գերտերություններն այդ տարածքների հաշվով ինչ պայմանավորվածություններ են ձեռք բերել. «Էրդողանը բոլոր մակարդակներով հայտարարում է, որ Աֆրինով չի սահմանափակվելու և գործողությունները շարունակվելու են մինչև Իրաք, սա վտանգավոր է լինելու հայկական կողմի համար, քանի որ այդ տարածքներում ապրող հայկական համայնքները կհայտնվեն կրակի տակ»,-ասաց Հովհաննիսյանը:

Թուրքագետ Սոնա Սուքիասյանն էլ հավելեց, որ հայերիս համար այս պահին կարևոր է Թուրքիայի թիրախում հայտնված Ղամիշլիի հարցը՝ նշելով, որ Հալեպից հետո Ղամիլշլին երկրորդ ամենախոշոր տարածքն է, որը  բնակեցված է մեծամասամբ հայերով. «Քրդական ուժերը, որոնք վերահսկողության տակ են պահում Ղամիշլին, ստեղծում են նախադրյալ, որ թուրքական կողմը ռազմական գործողություններ սկսի նաև Ղամիշլիում»,-ասաց նա՝ հավելելով, որ այս պահին այդ տարածքում ապրող հայությունը կանգնած է բնաջնջման եզրին:

Նշենք, որ Ռուսաստանի Դաշնության (ՌԴ) նախագահ Վլադիմիր Պուտինը ապրիլի 2-ին աշխատանքային երկօրյա այցով մեկնել է Թուրքիա, որտեղ նախատեսվում է հանդիպում Թուրքիայի նախագահ Ռեջեփ Թայիփ Էրդողանի հետ։  

Հետաքրքրական է, որ Պուտինը ապրիլի 3-ին մեկնում է Անկարա, իսկ ապրիլի 2-ին ՌԴ հարավային ռազմական օկրուգը հայտարարում է Հայաստանի «Ալագյազ» բարձր լեռնային զորավարժարանում զորավարժություն սկսելու մասին: 

Հավելենք նաև, որ արդեն խոսվում է ռուս-թուրքական դաշինքի, ռազմակավարական գործընկերության մասին, բայց խորքային առումով Թուրքիան Ռուսաստանի համար ներկայում գլխացավանք է եւ խորհրդանշական է, որ Պուտինը ապրիլի 3-ին մեկնում է Անկարա, իսկ ապրիլի 2-ին ՌԴ հարավային ռազմական օկրուգը հայտարարում է Հայաստանի «Ալագյազ» բարձրլեռնային զորավարժարանում զորավարժություն սկսելու մասին, որը բավականին մասշտաբային է, ներառելու է մոտ 300 միավոր տեխնիկա, ավիացիա, հակաօդային պաշտպանության միջոցներ:

Աղավնի Սուքիասյան