ԱՄՆ նոր պահանջը Հայաստանից
Վերլուծական Հայաստանում ԱՄՆ դեսպանատան Ֆեսյբուքյան էջից տեղեկանում ենք, որ երեկ Դեսպան Միլսը հանդիպել է ՀՀ Ազգային ժողովի Հայաստան-ԱՄՆ բարեկամական խմբի պատվիրակության անդամների հետ, ովքեր վերջերս այցելել էին Միացյալ Նահանգներ:
Ուշագրավ է այն ժամանակահատվածը, երբ տեղի է ունենում այս հանդիպումը: Մի կողմից բոլորիս հիշողության մեջ թարմ է Միլսի՝ օրեր առաջ արված հայտարարությունը: «Սասնա Ծռերի» վերաբերյալ դեսպանի գնահատականը միանշանակ էր եւ որեւէ տարընթերցման տեղիք չի տալիս: ԱՄՆ դեսպանի խոսքի բովանդակությունից զատ՝ շատ ավելի էական էր այն կոնյունկտուրան, ժամանակային միջակայքը, որում հնչեցվել է հայտարարությունը: Բանն այն է, որ «ծռության» քաղաքական խոսափող համարվող «Հանուն Հայաստան պետության» ճակատն այս օրերին ակտիվ փողոցային պայքար է ծավալում Սերժ Սարգսյանի իշխանավարման դեմ, եւ տեղի ունեցող հանրահավաքներում հնչում են հայտարարություններ, որոնք, մեղմ ասած, գտնվում են քաղաքականության եւ բռնության սահմանագծին: Ավելին՝ օրեր առաջ «Սասնա Ծռեր» խմբավորման խոսնակ Վարուժան Ավետիսյանը բանտից իրենց կողմնակիցներին, ըստ էության, զինված ապստամբության կոչ արեց: Ահա այս համատեքստում ԱՄՆ դեսպանի հայտարարությունը կիրառական քաղաքական նշանակություն է ստանում. Վաշինգտոնը թափանցիկ ակնարկում է, որ չի հանդուրժելու իշխանության տապալման հակասահմանադրական որեւէ փորձ: Այս հայտարարությանը հաջորդում է հայաստանյան պատվիրակության այցը ԱՄՆ դեսպանատուն, և այդ այցը ցույց է տալիս ԱՄՆ-ի՝ հայաստանյան քաղաքական օրակարգի վերաիմաստավորման կենցեպցիան, որի առանցքում խորհրդարանական ուղղությունն է լինելու:
Թեև հայկական կողմն այս հանդիպումը փորձելու է շահարկել իր օգտին, ընդգծելով հայ-ամերիկյան երկկողմ հարաբերություններում նկատվող դրական դինամիկան և այդ ուղղությամբ տարվող տքնաջան աշխատանքը, հասկանալի է, որ խորհրդարանականներին ավելի շուտ բերման էին ենթարկել ԱՄՆ դեսպանատուն: Ընդ որում, դժվար չէ կռահել, թե տեղի ունեցող քաղաքական զարգացումների ֆոնին հատկապես ինչ մեսիջ է հղվել պատվիրակության անդամներին: Հնարավոր է՝ Միլսը հուշել է, որ ամերիկյան կողմից ծայրահեղական ուժերի քննադատությունը չպետք է հանգստացնի հայկական կողմին և վերջիններս պետք է նաև խորհրդարանական հարթակում, այսպես ասած՝ մատը մատին խփեն քաղաքական առավել ծանրակշիռ օրակարգ առաջարկելու համար: Նման քայլեր հայկական կողմից ԱՄՆ-ն չի նկատել: Թերևս դա է պատճառ հանդիսացել, որպեսզի հայկական պատվիրակությունը ևս մեկ անգամ նույն կազմով հավաքվի՝ այս անգամ արդեն ոչ թե պատմական լուսանկարներ անելու, այլ «դաստիարակչական» զրույցի նապատակով:
Ստելլա Խաչատրյան
ՈՒՂԻՂ ԵԹԵՐ
Ամենադիտված 
«Լևոն արքայի» նկատմամբ որպես խափանման միջոց է ընտրվել տնային կալանքը (տեսանյութ)
