Դրամահավաք՝ մարզպետների համար
ՎերլուծականՇարունակվում է պաշտոնյաների կողմից Բարձրաստիճան պաշտոնատար անձանց էթիկայի հանձնաժողով՝ հայտարարագրերի ներկայացումը: Այս անգամ իրենց պերճաշուք կյանքը հանրության դատին են ներկայացրել մեր երկրի ֆեոդալները՝ նույն իրենք՝ մարզպետները: Վերջիններիս ներկայացրած փաստաթուղթը աչքի տակով անցկացնելուց հետո մեծագույն ցանկություն է առաջանում համազգային դրամահավաք հայտարարել հայրենիքին անմասն նվիրվող, պարկեշտ, աշխատասեր, բայց մի կերպ ծայրը-ծայրին հասցնող մեր պաշտոնյաներին թեկուզ ինչ-որ կերպ նեղ ֆինանսական դրությունից ազատելու նպատակով:
Իսկ որ դրությունը իսկապես նեղն է՝ թվերն են ասում: Օրինակ՝ Տավուշի մարզպետ Հովիկ Աբովյանը հայտարարագրել է 92 հազար դոլար եւ 24 միլիոն դրամ: Մարզպետի տարեկան եկամուտն ընդամենը 6 միլիոն դրամ է, այն էլ՝ աշխատավարձից ստացած գումարը: Աբովյանը ոչ անշարժ, ոչ շարժական գույք է հայտարարագրել, ոչ թանկարժեք իրեր, ոչ էլ որեւէ այլ կարողություն: Այսքանից հետո մնում է ենթադրել, որ մարզպետը քնում է մարզպետարանի շենքում և Սոցապ նախարարության հանցավոր անփութության պատճառով է միայն, որ դեռևս չի ներառվել «Փարոս» ծրագրի շրջանակներում: Աբովյանին գուցե օգնության ձեռք մեկնի իր տիկինը, ով, ի դեպ, հայտարարագրել է 372,500.00 եվրո եւ 90 միլիոն դրամ. ասել է թե՝ ավելին, քան ամուսինը, մինչդեռ համեստորեն լռել է այդ եկամտի ձևավորման աղբյուրների մասին:
Ավելի լավ ֆինանսական դրության մեջ չէ Շիրակի դաշնակցական մարզպետ Արթուր Խաչատրյանը: Վերջինիս հայտարարագրից իմանում ենք, որ Նա 2017թ.-ին բնակարան է գնել՝ 19 միլիոն դրամով: Ինչպես երեւում է՝ մարզպետը բնակարանը ձեռք է բերել վարկով, նա վերցրել է նույնչափ վարկ, սակայն տարեվերջում հասցել է մարել մոտ կեսը, հայտարարագրել է 3,2 միլիոն դրամ եւ 4 հազար դոլար, տարեկան եկամուտը 14 միլիոն դրամ է, որից վեցը երկու տեղով աշխատավարձից, մնացածը՝ փոխառությունից ստացած գումար: Աղետի գոտում, դոմիկներում ապրող մեր հայրենակիցների միակ սփոփանք էլ թերևս դա պետք է լինի՝ մարզպետն էլ իրենց օրին է, վարկի հույսին է մնացել:
Այն, որ դաշնակցականը միայն սոված փորով «Գինի լից» երգող հայրենասերը չէ, ապացուցում է դաշնակցական մեկ այլ մարզպետ՝ Արագածոտնի մարզի ղեկավար Աշոտ Սիմոնյանը: Նրա հայտարարագրած 6 միլիոն դրամը տարվա ավարտին բարեհաջող կերպով 10-ի է վերածվել: Բացի այդ՝ ընկեր Աշոտը հայտարարագրել է նաև 12 հազար դոլար, 8 հազար եվրո: Նրա տարեկան եկամուտը կազմում է 13 միլիոն դրամ, որից 8,7 միլիոնը շահութաբաժին, մնացածը՝ աշխատանքից եւ հավասարեցված այլ վճարումներից ստացված գումար: Միևնույն ժամանակ՝ մյուս մարզպետների հայտարագրերի ֆոնին Սիմոնյանինն էլ անչափ խղճուկ է: Ոչինչ, դեռ ժամանակ ունի, կարելի է վստահ լինել, որ շատ արագ կշտկի դրությունը:
Ստելլա Խաչատրյան
ՈՒՂԻՂ ԵԹԵՐ
Ամենադիտված 
«Լևոն արքայի» նկատմամբ որպես խափանման միջոց է ընտրվել տնային կալանքը (տեսանյութ)
