ՄԻԵԴ-ի հերթական վճիռն՝ ընդդեմ Հայաստանի

Մարդու իրավունքների եվրոպական դատարանը հերթական վճիռն է կայացրել ընդդեմ Հայաստանի: ԼՈւՐԵՐ.com-ը ՄԻԵԴ-ի պաշտոնական կայքից տեղեկացավ, որ այս անգամ դատարանը պետությանը պարտավորել է որպես բարոյական փոխհատուցում 2 410 եվրո վճարել ՀՀ քաղաքացի Կարեն Պողոսյանին:

ՄԻԵԴ-ի 2018-ի մարտի 29-ի որոշման համաձայն՝ տեղի է ունեցել Մարդու իրավունքների մասին կոնվենցիայի (արդար դատաքննության իրավունքի) 6-րդ հոդվածի և 1-ին հոդվածի 1-ին արձանագրության (սեփականության իրավունք) խախտում:

ՄԻԵԴ-ն արձանագրել է, որ դիմումատուի հայցի փոխհատուցման համար Հայաստանը պարտավոր է ոչ նյութական վնասի համար Կարեն Պողոսյանին վճարել 1.000 եվրո գումարի չափով փոխհատուցում և 1.410 եվրո՝ դատական ծախսերի համար։ Ստացվում է՝ Կառավարությունը ՀՀ քաղաքացի Կարեն Պողոսյանին որպես ոչ նյութական վնասի փոխհատուցում կվճարի 2410 եվրո: 

Նշենք, որ Կարեն Պողոսյանը 2009-ի նոյեմբերի 18-ին  հայց էր ներկայացրել պահանջով՝ իրեն վճարել 92 000 եվրո: Դիմումում նշել, որ տեղի է ունեցել արդար դատաքննության իրավունքի և սեփականության իրավունքի խախտում։ 

ՄԻԵԴ-ի կայքէջից տեղեկանում ենք, որ դիմումատուն առանց թույլտվության Երևանի արվարձաններից մեկում 1000 քմ մակերեսով հողատարածքի վրա կառուցել է 500 քմ ընդհանուր մակերեսով շինություն: Այն բաղկացած է եղել պահեստից ու անավարտ շինությունից: 2001 թվականին դիմումատուն հատուկ հայց է ներկայացրել ՀՀ առաջին ատյանի դատարան՝ պահանջելով ձեռքբերման վաղեմության ուժով ճանաչել այդ շինության նկատմամբ իր սեփականության և օգտագործման իրավունքը: Ի դեպ, քաղաքացու հայցը բավարարվել է, և Անշարժ գույքի կադաստրից նրան տրվել է սեփականության վկայական: Սակայն տարիներ անց՝ 2009թ.-ին, գլխավոր դատախազի տեղակալն Առաջին ատյանի դատարանի վճռի դեմ բողոք է ներկայացրել Վերաքննիչ՝ պահանջելով մերժել դիմումատուի ձեռքբերման վաղեմության ուժով սեփականության իրավունքի ճանաչման պահանջը: Բողոքը բավարարվել է։

Սոնա Հարությունյան