Նոյեմբերյանի սարերը հանքեր չեն դառնալու. ստորագրահավաք՝ ընդդեմ հանքարդյունաբերության (լուսանկարներ)

«Ռեստարտ» Նոյեմբերյան համայնքի երիտասարդական նախաձեռնող խումբը Երևանում սկսել է ստորագրահավաք՝ ուղղված Նոյեմբերյանում հանքարդյունաբերության դեմ: 

ԼՈւՐԵՐ.com-ի թղթակցի հետ զրույցում նախաձեռնող խմբի անդամ Անի Հախվերդյանը նշեց՝ ստորագրահավաքի նպատակը Նոյեմբերյան համայնքի տարածքում երկրաբանահետախուզական և հանքերի շահագործման աշխատանքներն արգելելն է, որպեսզի հանքարդյունաբերական նախագծեր այլևս չիրականացվեն:

«Վերջին ժամանակաշրջանում սկսեց շոշափվել, որ Նոյեմբերյանի սարերը ուզում են վերածել հանքերի, որը բնականաբար բացասական արձագանք ստացավ նոյեմբերյանցիների կողմից: Յուրաքանչյուրի համար ավելի կարևոր է, որ իր ընտանիքը, երեխան մաքուր օդ շնչի, քան արդյունաբերության հետևանքով դուրս եկած ծուխը, որը վնասակար է մարդկությանը: Օրինակը մեզ համար Թեղուտի հանքն էր, որը ոչ մի դրական արդյունք չունեցավ թե առողջական խնդիրների, թե աշխատատեղերի առումով, մարդկանց շահագրգռեցին, որ աշխատատեղեր են բացում, բայց դա ընդամենը որոշ ժամանակ տևեց, իսկ այսօր շատերը գործազուրկ են, նույնը կարող է լինել Նոյեմբերյանում»,- ասաց նա: 

Երևանում գտնվող նոյեմբերյանցիները, բերդավանցիները, դովեղեցիներըը, ջուջևանցիները, ոսկևանցիները, ոսկեպարցիները, բարեկամավանցիները, կոթեցիները, բաղանիսցիները հավաքվել են, ինչպես իրենք են նշում, համայնքը փրկելուն միտված նախաձեռնությանը մասնակից լինելու: 

«Քանի որ այս պահին ուսանողությունը գտնվում է Երևանում և ժամանակ չի ունենում գնալ Նոյեմբերյան ստորագրելու համար, ուստի ստորագրահավաք կազմակերպեցինք նաև այստեղ: Գրեթե կես ժամ է՝ այստեղ ենք, բայց արդեն մոտ 100 ստորագրություն է հավաքվել»,- ասաց նախաձեռնող խմբի անդամը՝ ընդգծելով,որ առաջ են գնալու, Նոյեմբերյանի սարերը հանքեր չեն դառնալու: 

Նոյեմբերյանցիներն իրենց համայնքի վարչական սահմաններում գտնվող և համայնքին պատկանող տարածքում երկրաբանահետախուզական և հանքերի շահագործման աշխատանքներն արգելելու նպատակով Նոյեմբերյան համայնքի ղեկավար Կարեն Աբազյանին հանրագիր են ներկայացրել, որն ընդգրկում է 9 դրույթ:

Նշենք, որ ստորագրհավաք իրականացվում է այսօր՝ ապրիլի 5-ին, ժամը 15:00-21:00-ն մետրոպոլիտենի «Երիտասարդական» կայարանի հարակից այգում՝ «Բարեկամության ձեռքեր» քանդակի մոտակայքում։ 

Հավելենք, որ այս տարածքում «Պոլիմետալ Արմենիա» ընկերությանը պատկանող «Նորթ Էքսփլորեյշն Քոմփանի» ՍՊԸ-ն (կրճատ՝ «ՆԷՔո» ՍՊԸ, այսուհետ՝ Ընկերություն) մտադիր էր 2018-2021թթ. ընթացքում Լոռու և Տավուշի մարզերում իրականացնել երկրաբանահետախուզական աշխատանքներ։ Աշխատանքների նպատակը տարածաշրջանի հանքահումքային ներուժի և տարածաշրջանում լեռնահանքային ոլորտի զարգացման հեռանկարների վերհանումն էր:

«Պոլիմետալը» ոսկի և արծաթ արդյունահանող առաջատար ընկերություններից է Ռուսաստանում, Ղազախստանում և Հայաստանում: Հիմնադրվել է 1998թ.:

Սոնա Հարությունյան