Չեն իմացե՞լ, թե՞ չեն կարողացել դեմն առնել. «ՎիզաՄետրիկ»-ի արկածները Հայաստանում

ՀՀ արդարադատության նախարարության Անձնական տվյալների պաշտպանության գործակալությունը սեփական նախաձեռնությամբ սկսել էր ստուգման գործընթաց՝ պարզելու, թե որքանով է «ՎիզաՄետրիկ» սահմանափակ պատասխանատվությամբ ընկերության կողմից անձնական տվյալների մշակումը համապատասխանում ՀՀ օրենսդրությանը: Հայաստանի Հանրապետությունում Գերմանիայի արտակարգ եւ լիազոր դեսպան Մաթիաս Քիսլերը 2018 թվականի մարտի 28-ին՝ մամուլի ասուլիսի ժամանակ, հայտարարել է, որ 2018 թվականի ապրիլի 3-ից Երեւանում Գերմանիայի, Բելգիայի, Նիդեռլանդների, Լյուքսեմբուրգի, Ավստրիայի եւ Շվեդիայի համար ներկայացված Շենգենյան վիզայի դիմումները կընդունի ոչ թե Գերմանիայի դեսպանությունը, այլ «ՎիզաՄետրիկ» սահմանափակ պատասխանատվությամբ ընկերությունը, որը ռուս-թուրքական կոնսորցիում է եւ որի գլխամասը գտնվում է Թուրքիայում: Այսօր արդեն Գերմանիայի դեսպանատան տարածած հայտարարությունից պարզ է դառնում, որ ընկերությունը տեխնիկական պատճառներով դադարեցնում է վիզաների ծառայության տրամադրումը ՀՀ քաղաքացիներին: Ըստ ամենայնի՝ դեսպանատունն իրեն կպահի այդ լիազորությունը կամ կհանձնի մեկ այլ ընկերության: 

Այժմ չպարզված հարցը շարունակում է մնալ այն, թե ինչպես կարող էր ընդհանրապես այս ընկերությունը ստանալ Հայաստանում գործելու իրավունք: Դժվար է հավատալ, որ Գերմանիայի դեսպանն այնքան անտեղյակ է աշխարհաքաղաքական և պատմական զարգացումներից, որ ճիշտ չի գնահատել թուրքական ընկերությանը ՀՀ քաղաքացիների անձնական տվյալները վստահելու հետևանքները և ռիսկերը: Մյուս կողմից, դժվար է հավատալ նաև, որ հայկական կողմը նախապես տեղյակ չի եղել, թե ում է դեսպանատունը պատրաստվում հանձնել այս գործընթացի նկատմամբ վերահսկողությունը: Մնում է ենթադրել, որ հայաստանյան պատկան մարմիններն, ի սկզբանե տեղյակ լինելով, պարզապես չեն կարողացել նման որոշման դեմն առնել և այնուհետև գնացել են բավականին հնարամիտ՝ հանրային դժգոհության արհեստական ալիքը բարձրացնելու և գեներացնելու քայլին: Դրանով է նաև բացատրվում պրո-իշխանական լրատվամիջոցների կողմից խնդրի «ռասկրուտկա» անելը: Իհարկե, այժմ հարյուրավոր հայաստանցիներ կարող են թեթևացած շունչ քաշել, սակայն արդյո՞ք համապատասխան մարմինները դասեր քաղեցին այս դեպքից հետո… 

Ստելլա Խաչատրյան