Արևմուտքը կատարեց իր խաղադրույքը

Վերլուծական 6 Ապրիլ, 2018 20:40

Բրիտանացի լրագրող, «Քարնեգի» հիմնադրամի վերլուծաբան Թոմաս դե Վաալը ընդարձակ հոդվածում անդրադարձ է կատարել Հայաստանի կառավարման նոր համակարգին: Դե Վաալը վստահություն է հայտնել, որ քաղաքական-սահմանադրական նոր դասավորվածությունը եւ լիազորությունների բաժանումն ավելի լավ կաշխատեն Հայաստանի համար, քան նախկինները: «Անցյալ ամիս Հայաստան այցելելով, ես տեսա, որ տրամադրություններն ավելի դրական են, քան ես ակնկալում էի»,-գրում է նա: Նա նշում է, որ չորս տարի առաջ Հայաստանը վատագույն վիճակում էր. տնտեսությունը հազիվ վերականգնվել էր 2009 թվականի տնտեսական ճգնաժամի արդյունքում առաջացած մեծ կորուստներից:

Այնուհետև, փաստելով ձեռքբերումները, Դե Վաալն ակնարկում է, որ հայաստանցիների համար անչափ կարևոր պետք է լինի ներքին կայունության ապահովումը: Ակնարկն էլ ավելի ուշագրավ է դառնում ԱՄՆ դեսպան Միլսի՝ վերջերս արած հայտարարության ֆոնին, որտեղ դիվանագետն անթույլատրելի էր համարել ծայրահեղության դրսևորումները ներքաղաքական զարգացումների ժամանակ: Շատերը դա դիտարկեցին իբրև մեսիջ «ծռության» ջատագովներին: Այժմ Դե Վաալն իր հոդվածում անդրադառնում է արդեն հայաստանյան ինստիտուցիոնալ ընդդիմությանը՝ պահպանելով ուղերձի հիմնական բովանդակային մեխերը՝ «Մեր վրա հույս մի դրեք»: Փոխարենը, ապրիլի 9-ին ընադառաջ՝ այս հոդվածը կարելի է դիտարկել իբրև աջակցության ուղերձ՝ Սարգսյանի վարչապետական ամբիցիաներին:

Մի կողմից՝ Սարգսյանին հաջողվել է ստանալ ԵՄ պատվիրակության կողմից քիչ թե շատ ընդունելի գնահատական՝ անցկացված խորհրդարանական ընտրություններին, և դրանք համարվել են «անաղմուկ», մյուս կողմից՝ անաղմուկ չես անվանի Եմ հայաստանյան պատվիրակության շուրջ առաջացած սկանդալը, և դա այն պարագայում, երբ կոռուպցիայի առնչությամբ մեղադրանքներն ու քննադատությունը եղել է Եվրամիության պաշտոնյաների ու դիվանագետների խաղաքարտը կամ գործիքը Սերժ Սարգսյանի իշխանության դեմ: Հայաստանում ԵՄ դեսպան Սվիտալսկին նույնիսկ արել էր Սերժ Սարգսյանի համար ականջահաճո մի քանի հայտարարություն, այդ թվում՝ անցած տարվա փետրվարի վերջին, նրա՝ Բրյուսել կատարած այցի կապակցությամբ: Ստեղծված իրավիճակը հիմք է տալիս ենթադրելու, որ Եվրամիության հետ հարաբերությունների համատեքստում, Սերժ Սարգսյանի համար ստեղծվել է որոշակի բարվոք դիրքային վիճակ: Եվ անշուշտ, գործող նախագահի համար առանցքային է լինելու այս իրավիճակը պահպանելը և իր քաղաքական ծրագրերի հարցում Եվրոպական միության աջակցությունը ստանալը: Բրյուսելը միանշանակ լինելու է աշխարհաքաղաքական այն խաղացողների շարքում, որոնց «դաբրոն» Սերժ Սարգսյանի համար ունենալու է առանցքային նշանակություն:

Իրադարձությունների նման սցենարը մենք կանխատեսել էինք. երբ Ազատության հրապարակի հարթակը քաղաքացու կեցվածք չի ունենում, նույնիսկ գործող ավտորիտար, օլիգոպոլ իշխանությունը միջազգային հանրության աչքերում լեգիտիմացվում և ավելի քաղաքակիրթ է երևում: Այս ամենի համատեքստում ակնհայտ է, որ Սերժ Սարգսյանի վարչապետության դեմ ծավալվող պայքարը չի արժանանալու ոչ միայն մեր հասարակության, այլ նաև միջազգային հանրության աջակցությանը՝ ըստ էության նպաստելով Սերժ Սարգսյանի նոր իշխանության լեգիտիմությանը: Հայաստանում առեղծվածային իրավիճակ է ստեղծվել: Այլ հետխորհրդային երկրներում Արևմուտքը «աճեցնում» էր ընդդիմություն, որին հետագայում փորձում էր բերել իշխանության, որպեսզի «արեւմտականացնի» երկիրը: Այդպես եղավ Վրաստանում, Ուկրաինայում, Ղրղզստանում: Հայաստանում, ըստ ամենայնի, գործընթացը տեղի է ունենում այլ սցենարով: Արևմուտքը խաղադրույք է անում իշխող կուսակցության, ավելի ճիշտ՝ Սերժ Սարգսյանի վրա:

Ստելլա Խաչատրյան