Ռուս-թուրքական հարաբերությունները կարող են վերածվել ռազմավարականի. Կիրո Մանոյան

ՌԴ նախագահ Վլադիմիր Պուտինի՝ Անկարա կատարած այցը նրա վերընտրվելուց հետո առաջին պաշտոնական այցն է, սակայն պաշտոնական հաղորդագրություններում ոչ մի տեղ չի նշվում, որ հայության հետ առնչվող որևէ հարցի մասին քննարկում է անցկացվել: Այս մասին այսօր լրագրողների հետ հանդիպմանն ասաց ՀՅԴ Հայ դատի գրասենյակի քաղաքական հարցերի պատասխանատու Կիրո Մանոյանը:

Նրա խոսքով մեզ պետք է մտահոգի այն, որ թեև ռուս-թուրքական հարաբերությունները դեռ ռազմավարական բնույթի չեն, բայց այդ ուղղությամբ են շարժվում. «Պետք է զգոն լինենք այս հարաբերությունների զարգացումներում՝ նկատի ունենալով, որ դրանք կարող են վերածվել ռազմավարականի, իսկ մենք որպես փաստ տեսել ենք, որ այն ժամանակ, երբ Ռուսաստանն ու Թուրքիան կունենան ռազմավարական հարաբերություններ, դա թանկ կնստի մեզ վրա»,- ասաց նա:

Անդրադառնալով հայության հետ կապված Թուրքիայի հայտարարություններին, Մանոյանը նշեց, որ դրանք ևս մտահոգիչ պիտի լինեն մեզ համար. «Հատկապես պետք է մտահոգիչ լինի, եթե Ղամիշլիի շրջանում, որն այսօր  գտնվում է Թուրքիայի վերահսկողության տակ, ռազմական գործողություններ ծավալեն»,- նշեց նա:

Խոսելով հայ-թուրքական արձանագրություններից Մանոյանն ասաց, որ Թուրքիան ակնկալում էր, թե տարածաշրջանում ինչ-որ փոփոխություններ պիտի տեղի ունենան, այդ դեպքում նոր պայմաններում նոր բանակցություններ պիտի լինեն, սա էր Մյունխենում ՀՀ նախագահի շեշտածը:

Ըստ նրա՝ սփյուռքը դեմ չէ Հայաստան-Թուրքիա հարաբերություններին. «Սփյուռքում կային նաև ուժեր, ովքեր Հայաստանի իշխանությունների մոտեցմանը կողմնակից էին, հարցն այն է, թե այդ հարաբերություններն ինչ գնով պետք է սկսվեին: Պետք է Հայաստան-Թուրքիա հարաբերություններ սկսվեն, եթե պիտի բարիդրացիական հարաբերություններ ունենանք, չի կարելի շրջափակման մեջ պահել։ Պետք է լինի հարաբերությունների նորմալ ընթացք, ոչ թե Հայաստանն ինչ-որ բան վճարի»,- ասաց նա՝ ավելացնելով, որ Թուրքիայի ու Ադրբեջանի հույսը եղել է այն, որ մենք ծնկի գանք, բայց մենք ծնկի չենք եկել։