Սարգսյանը վերցնում է նախաձեռնությունը. կրեմլյան ցուցակի հայկական ստվերը

Վերլուծական 7 Ապրիլ, 2018 19:30

Ինչպես գիտենք, Միացյալ Նահանգների ֆինանսների նախարարությունը հրապարակել էր բարձրաստիճան պաշտոնյաների ու նախագահ Պուտինի մերձավոր օլիգարխների ցանկը, որոնք առաջիկայում կարող են հայտնվել ամերիկյան պատժամիջոցների տակ: Կոնգրես ուղարկված ցուցակում կրեմլյան ողջ էլիտան է, այդ թվում՝ ռուսաստանաբնակ հայ գործարարներ Սամվել Կարապետյանը, Դանիլ Խաչատուրովը և Սերգեյ Գալիցկին (Հարությունյան): Երեկ ԱՄՆ ֆիննախը թարմացրել է այս ցանկը, ներառելով ևս մի քանի գործարարի, թեև հայկական ազգանուններ այստեղ չկան, միևնույն ժամանակ «համաներման» տակ ևս չեն հայտնվել, չնայած այն փաստին, որ ամերիկյան կողմը ուղղվելու ժամանակ և հնարավորություն էր տվել:

Մեզ ավելի շատ հետաքրքրում է թե ինչպիսի հետևանք կարող է ունենալ հայ գործարարների ՝ Կրեմլյան Ցանկում այսքան երկար ժամանակ մնալը: Իսկ այստեղ արդեն շատ ուշագրավ դիտարկումներ կան՝ կապված Հայաստանի ներքաղաքական զարգացումների և տնտեսա-քաղաքական վերադասավորումների հետ: Մի բան ակնհայտ է, որ Սամվել Կարապետյանը այժմ չի ցուցաբերում այն քաղաքական հավակնությունները, որոնք առկա էին Կարեն Կարապետյանի կողմից վարչապետի պաշտոնը զբաղեցնելու օրերին: Եթե այն ժամանակ Սամվել Կարապետյանի ամեն օր գոլեր խփելու ցանկություն էր հայտնել, ապա իրավիճակը այժմ այնպիսինն է, որ գոլերը ընդունում է հենց ինքը: Հաշվի առնելով հնարավոր վերդասավորումները երկրի կառավարման բարձրագույն էշելոնում, ապա վարչապետական ամբիցիաներ դրսևորող Սերժ Սարգսյանի համար ստեղծված իրավիճակը ավելի քան ձեռնտու է: Մի կողմից՝ սանկցիաները չեն կարող ազդել Տաշիր Գրուպի կողմից արդեն իսկ խոստացված նեդրումների ծավալների վրա, իսկ նոր մեգա նախագծեր Ներդրողների ակումբը և Կարապետյանները կարծես չեն էլ պատրաստվում իրականացնել:

Դրա վառ ապացույցը եղավ օրերս, երբ տեղեկատվություն տարածվեց, թե Սերժ Սարգսյանի բարձր հովանու ներքո բացված «Ալեքսանդր» հյուրանոցը Ներդրողների ակումբի հերթական քայլերից է, քանզի ներդրողը՝ Սերգեյ Համբարձումյանը, համարվում է Ներդրողների ակումբի անդամ: Մինչդեռ այդ տեղեկատվությունը միանգամից հերքվեց, ընդ որում հենց Ներդրողների Ակումբի ներկայացուցչի կողմից: Վերջիններս հայտարարեցին, որ ակումբը դեռ փայատերեր չունի, ծրագրերը երկարատև են, աշխատանքն էլ նախապատրաստական փուլում է: Ասել է թե՝ ուզեինք էլ՝ ի վիճակի չեինք լինի: Մյուս կողմից Սերժ Սարգսյանը առանձնապես չի նեղվի Ակումբի կողմից նախանշված ծրագրերի թերակատարումից, քանի որ դա ևս կհամարվի Կարապետյանների ձախողումը: Փոխարենը արդեն վարչապետի պաշտոնում Սերժ Սարգսյանը հնարավորություն կունենա վերահսկել խոշոր կապիտալի ներկայացուցիչներին, սահմանափակելով նրանց մանեվրելու հնարավորությունը: Ինչ վերաբերվում է ներդրումներին, ապա «դրսի» աչքում լեգետիմ Սարգսյանը դժվարություններ չի ունենա դրանք ներգրավվելու հարցում: Համեմայնդեպս նրան կհաջողվի պահպանել ներկա տեմպը: Կարապետյանի ներդրումների առյուծի բաժինը ուղղվել են էներգետիկ ոլորտ, որը այս փուլում դինամիկ զարգացման վիճակում է: Եվ այստեղ անթաքույց արևմտյան, չինական, իրանական լուրջ մրցակիցներ կան: Գուցե հենց այս փաստ է , որ վստահություն է ներշնչում Սարգսյանին, և նյարդայնանալու առիթ հանդիսանում ՝Կարապետյանների համար:

Ստելլա Խաչատրյան