Սա վիթխարի պատասխանատվություն է երկրի, ժողովրդի եւ պատմության առջեւ. Արմեն Սարգսյան

Ազգային ժողովի հատուկ նիստում երդմամբ ՀՀ նախագահի լիազորությունները ստանձնած Արմեն Սարգսյանը պաշտոնակալումը վիթխարի պատասխանատվություն է համարում երկրի, ժողովրդի եւ պատմության առջեւ: «Այսօր ինձ մեծ պատիվ է վիճակվել ստանձնելու  ՀՀ նախագահի բարձր պաշտոնը»,-այս տողերով սկսեց իր ելույթը Հայաստանի Հանրապետության չորրորդ նախագահ Արմեն Սարգսյանը` ապրիլի 9-ին Մարզահամերգային համալիրում մեկնարկած երդմնակալության արարողության ժամանակ:

«Վեհափառ Տեր, մեծարգո պարոն Նախագահ եւ տիկին Սարգսյան, Արցախի Հանրապետության մեծարգո նախագահ, ԱԺ մեծարգո նախագահ, հարգելի պատգամավորներ, մեծարգո վարչապետ, կառավարության անդամներ, ձերդ գերազանցություններ, դիվանագետներ, ՀՀ հարգելի քաղաքացիներ, թանկագին հայրենակիցներ եւ հյուրեր, տիկնայք եւ պարոնայք: Այսօր ինձ մեծ պատիվ է վիճակվել  ստանձնելու  ՀՀ նախագահի բարձր պաշտոնը: Այն ինձ մղում է լարել իմ ողջ ուժերն ու եռանդը՝ արդարացնելու այն վստահությունը, որ մարտի 2-ին իմ հանդեպ ցուցաբերեց ՀՀ ազգային ժողովը` արդարացնելու նաև այն հույսերը, որ ինձ հետ կապում են ՀՀ բնակչության ամենատարբեր շերտերը` մտավորականությունից մինչեւ պարզ քաղաքացիներ, ինչպես նաև Արցախի եւ Սփյուռքի մեր հայրենակիցները, որոնք սրտացավ և ուշադիր հետևում են մայր հայրենիքի ձեռքբերումներին ու մաքառումներին»,- նշեց Արմեն Սարգսյանը:

Հանրապետության չորրորդ նախագահի խոսքով` իրեն ուժ է տալիս հավատը երկրի և ժողովրդի ապագայի հանդեպ, հավատը Հայաստանի քաղաքացիների և աշխարհով մեկ սփռված քույրերի ու եղբայրների աշխատասիրության ու տաղանդի հանդեպ:

Նորընտիր նախագահ Արմեն Սարգսյանը երդվեց` ձեռքը դնելով Վեհամոր Ավետարանի և ՀՀ Սահմանադրության վրա: Երևանի Կարեն Դեմիրճյանի անվան մարզահամերգային համալիրում ապրիլի 9-ին գումարված Ազգային ժողովի հատուկ նիստում հնչեց Արմեն Սարգսյանի երդումը. «Ստանձնելով Հանրապետության նախագահի պաշտոնը՝ երդվում եմ. հավատարիմ լինել Հայաստանի Հանրապետության Սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական ու համազգային շահերով և իմ ողջ ուժը ներդնել ազգային միասնության ամրապնդման գործում: Աստված ինձ օգնական»:  

Երդմնակալությունից հետո հնչեց Հայաստանի Հանրապետության օրհներգը, Ամենայն Հայոց Գարեգին Բ կաթողիկոսը հայրապետական օրհնանքի խոսք հղեց:

Հայաստանի Հանրապետությունն ապրիլի 9-ից անցում է կատարում լիարժեք խորհրդարանական կառավարման համակարգի: Լրանում է Նախագահ Սերժ Սարգսյանի լիազորությունների ժամկետը: Սահմանադրության համաձայն՝ սպասվում է ՀՀ կառավարության հրաժարականը: Կառավարության անդամները շարունակում են իրենց պարտականությունների կատարումը մինչև նոր Կառավարության կազմավորումը: