Մուտքի արգելք չունեցող «Դժոխքի ձորը» ցանկապատել են. ահազանգ (լուսանկարներ)

Արարատի մարզում գտնվող «Դժոխքի ձորը» (Դժոխաձոր, Արածո կիրճ) քայլարշավային զբոսաշրջության հայտնի վայրերից է, որի տարածքը վերջերս ցանկապատել են՝ արգելելով մարդկանց մուտքը: Մինչև 2017 թ. վերջը, «Դժոխքի ձոր», մուտքի որևէ իրավական արգելք չկար, և այցելուները կարող էին մտնել այս տարածք՝ առանց որևէ թույլտվության: Սակայն 2018 թ. հունվարին «Դժոխքի ձորի» սկզբնամասում նկատվել է տեղադրված տեղեկատվական վահանակ, որի վրա գրված է, որ տարածքը հանդիսանում է Կովկասյան կենսաբազմազանության ապաստարան կազմակերպության հսկողության գոտի: 

ԼՈւՐԵՐ.com-ի թղթակցի հետ զրույցում, երկրաբան Տիգրան Լորսաբյանն, անդրադառնալով վերը նշված հանգամանքին, ասաց՝ տեղյակ չէ, թե ովքեր և ինչու են որոշել փակել Դժոխքի ձորը. «Ինձ համար միայն մի բան է ընդունելի, որքան էլ կենդանիների պաշտպանության հետ կապված գործողություններ իրականացնեն, այն չպետք է վնասի էքստրեմալ տուրիզմի զարգացմանը, տարածքի վայրի մնալուն, ձևափոխությանը: Տեսել եմ ցանկապատը, որով փակած էր կիրճի բերանը (որն, ի դեպ, կարող է կենդանիների ազատ տեղաշարժի համար խոչընդոտ լինել), պլաստմասսե խողովակով վերևից ջուր էր բերված, խաղողի ոստեր կար տնկած, մի քանի նոր ծառ էր տնկած։ Դրանից ավել ձևափոխությունը ո՞նց է լինում»,- ասաց նա՝ ավելացնելով, որ չգիտի, թե ինչ նպատակով է դա արվում։

Նրա խոսքով՝ տուրիզմի զարգացման և օտարերկրյա զբոսաշրջիկների համար մի շարք կարևոր հանգամանքներ կան. «Շատ կարևոր է տեղանքի բուսականությունը պահպանելը, ինչպես նաև հարկավոր է, որպեսզի որևէ մարդկային գործոն չլինի, քանի որ նման տեղերն արդեն իսկ կոմֆորտի զոնայից դուրս են: Այդտեղ եկող զբոսաշրջիկն ուզում է քրտնել, սուր զգացողություններ ունենալ, զգալ իրեն վայրի տեղում»,- ասաց նա:

  

Երկրաբանը նշեց՝ նախաձեռնողների հետ դեռևս չեն հանդիպել, բայց առաջիկայում քննարկում է լինելու կազմակերպության ներկայացուցիչների և արշավներ, էկոտուրիստական շրջագայություններ կազմակերպողների միջև, որի ժամանակ անդրադառնալու են Դժոխքի ձորին:  

 

Նշենք, որ հանդիպում-քննարկումը նախատեսվում էր անցկացնել ապրիլի 23-ին, սակայն կապված ապրիլ ամսին տեղի ունեցող քաղաքական իրադարձույթւոնների հետ, հանդիպումն այդպես էլ չկայացավ:

 

Սոնա Հարությունյան