Երթի մասնակիցները մտան Հանրային ռադիոյի շենք. Փաշինյանն ուզում է ուղիղ եթեր մտնել. ուղիղ միացում (լուսանկարներ)

«Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորած «Իմ քայլը» երթի մասնակիցները ձեռքերը վեր պարզած մտան Հանրային ռադիոյի շենք: Նրանք բարձրացան վերևի հարկ, կոտրեցին դռներից մեկը:

«Որևէ մեկը որևէ բանի ձեռք չտա: Որևէ մեկի հասցեին, որևէ ոստիկանի հասցեին թթու խոսք չլսեմ»,- հայտարարեց Նիկոլ Փաշինյանը՝ ներողություն խնդրելով ոստիկաններից, որոնց անհարմարություն են պատճառում:

«Տեսաք, որ հարգելի ոստիկանը զենքը ձեռքին լիցքավորած պարզեց ինձ վրա, ես ոչ մի բառով չվիրավորեցի, թթու խոսք չասացի, ասացի որ, եթե պետք է կրակես՝ սպանես, ուրեմն կրակի սպանի: Եվ մենք այստեղ ենք»,- ասաց նա:

Նիկոլ Փաշինյանը ցանկացավ ուղիղ եթեր մտնել, բայց սարքերը անջատված էին և նա Հանրային ռադիոյի նախկին աշխատակիցներին խնդրեց օգնել այդ հարցում, որպեսզի ինքը կարողանա ուղերձ հղել:

Այնուհետև նրան մոտեցավ Հանրային ռադիոյի փոխտնօրեն Լիկա Թումանյանը՝ առաջարկելով ազատել տարածքը, որից հետո ժամը 17:00-ին իրենք պատրաստ են ուղիղ եթեր տրամադրել Փաշինյանին. «Չենք կարող անմիջապես ուղիղ եթեր ապահովել, քանի որ եթերացանցը պետք է բնականոն հունով աշխատի, հակառակ դեպքում կստացվի արտակարգ իրավիճակ»: 

Սակայն Փաշինյանը չհամաձայնեց, Լիկա Թումանյանը գնաց ղեկավարության հետ պայմանավորվելու, թե արդյո՞ք պատրաստ են եթեր տրամադրել Նիկոլ Փաշինյանին: Նշենք, որ դրանից հետո անջատեցին Հանրային ռադիոյի էլեկտրաէներգիան: 

Նիկոլ Փաշինյանը հայտարարեց, որ ուղիղ եթեր ապահովող լրատվամիջոցների միջոցով Հանրային ռադիոյի ստուդիայից ուղերձով կդիմի ժողովրդին: Ապա կարճ ժամանակ խնդրեց ուղերձը պատրաստելու համար:

Մանրամասներին հետևեք ուղիղ միացմամբ

Լուսանկարները՝ news.am-ի: