Արևելքի ամենանորաձև կինը. ինչու են բոլորը հիանում շեյխուհի Մոզայի ոճով

Շեյխուհի Մոզա բինտ Նասեր ալ Միսնեդն արաբական աշխարհի ամենաոճային ու ազդեցիկ կինն է, որն իրեն կարող է թույլ տալ հրաժարվել հիջաբից ու փարանջայից: Արաբական աշխարհի համար շեյխուհու ոճը խիստ համարձակ է, գրում է spletnik.ru-ն

Հայտնի է, որ շեյխուհի Մոզան Քաթարի նախկին էմիր շեյխ Համադ բին Խալիֆա ալ Թանիի 2-րդ կինն է, որին ամուսինը մահմեդական աշխարհի խիստ «դրես կոդը» խախտելուց բացի թույլ է տվել նաև միջամտել պետական գործերին:

 

Շեյխուհու կյանքը նման է արևելյան հեքիաթի, և եթե ինչ-որ մեկը որոշեր նրա կյանքի մասին ֆիլմ նկարահանել, ապա կստացվեր «Հրաշալի դարաշրջան» սերիալի ոճով մի բան. պարզապես Սուլեյման սուլթանի փոխարեն կլիներ Քաթարի թագաժառանգը, իսկ Հյուրեմի փոխարեն՝ քաթարցի ազդեցիկ գործարարի դուստր Մոզան:

Ապագա շեյխուհին ամուսնու հետ ծանոթացել է 18 տարեկանում, սակայն ամուսնության հարցում չի շտապել: Սկզբում նա ընդունվել է Քաթարի համալսարան, որտեղ ուսումնասիրել է հոգեբանություն: Այնուհետև նա մեկնել է ԱՄՆ, որտեղի համալսարաններում էլ շարունակել է կատարելագործել մասնագիտական հմտությունները: Դրանից հետո Մոզան ամուսնացել է ու առաջին տարիները նվիրել երեխաներին:

Ամուսնու՝ իշխանության գալուց հետո շեյխուհին, որին հաճախ անվանում են արաբական աշխարհի գորշ կարդինալ, սկսել է համակարգել մարդասիրական ու բարեգործական ծրագրերը՝ աշխարհին ներկայանալով  առաջատար նորաձևության տների սքանչելի հանդերձներով:

 

Նորաձևության ոլորտի փորձագետների պնդմամբ՝ շեյխուհու առաջադեմ կերպարները բացառապես չեն համապատասխանում Քաթարում տիրող իրավիճակին: Այնտեղ կանայք կրում են գլուխը, դեմքն ու մարմինն ամբողջությամբ ծածկող աբայաներ, մինչդեռ Մոզան սահմանափակվում է միայն տյուրբան կրելով և նույնիսկ կարող է իրեն թույլ տալ տաբատ հագնել:

 

58-ամյա շեյխուհին, որը 7 երեխայի մայր է, զբաղեցնում է մի շարք պետական ու միջազգային պաշտոններ, ունի աշխարհի առաջատար բուհերի պատվավոր դոկտորի կոչումներ:

Մոզայի մասին խոսելիս առանձին ուշադրության է արժանի ամուսնու վրա ունեցած նրա ազդեցությունը: Չնայած, որ շեյխ Համադը Մոզայից բացի ունի ևս 2 կին և, ընդհանուր առմամբ, 24 ժառանգ, այնուհանդերձ՝ նա Քաթարի էմիրի պաշտոնը ժառանգել է Մոզայից ծնված որդուն՝ Թամիմին:

 

Ասում են նույնիսկ, որ շեյխ Համադը 3-րդ անգամ ամուսնացել է ոչ թե սիրուց դրդված, այլ ի հեճուկս Մոզայի, որպեսզի ապացուցի, որ կնոջ իշխանությունն անսահման չէ: Այնուհանդերձ՝ շեյխի 2 կանանցից որևէ մեկին չի հաջողվել զբաղեցնել Մոզայի տեղը: