Հուզմունքս մեծ է, հիացմունքս՝ անսահման, սերս՝ տիեզերական, դուք իմ ընտանիքն եք. Հայկո

Այսօրվա հանրահավաքին ելույթով բոլորին ողջունեց դերասան Հայկ Մարությանը՝ կարգին Հայկոն, ով շարժման ամենասկզբի օրերից միացավ նրան:

«Բարեւ իմ հարազատներ, իմ ընտանիքի անդամներ, այստեղ հավաքվել է 1 ընտանիք: Ճիշտն ասած այս օրերին կատակ անելս չէր գալիս, բայց էսօր հենց գնացի տուն, կատակ արեցի ու բեղերս հեռացրեցի, հետո հիշեցի այն պահը, երբ մեր տղերքին բառիս բուն իմաստով գողացան ու տարան ու մտածեցին՝ ըհը, ոնց որ կպնում է, հետո տեսան, որ հարյուր հազարավոր մարդիկ դուրս են եկել փողոց, ես պատկերացրեցի նրանց դեմքը, որ համակարգչի առաջ նստած հարցնում էին՝ շքամա՞ շքամա՞, մենք էլ պատասխանում էինք՝ հաաաաաա:

Նիկոլը այն մարդն է, որը ի սկզբանե սրան հավատաց, մենակով սկսեց դա ու այս բոլորովս ավարտեցինք այդ ամենը»:

Այս խոսքեից հետո Հայկոն ու քաղաքացիները «Նիկոլ» էին վանկարկում:

Հայկ Մարությանը շարունակեց. «Հիմա հարցնում են՝ ի՞նչ է լինելու հետո, հետոն լա՛վ է լինելու: Մենք շատ անելիքներ ունենք, եւ համոզված եմ, որ մենք կանենք այն ամեն մեկս մեր տեղում, սա լավ ճանապարհի սկիզբ է:

Եվ այսպես, դուք պատկերացնում եք, եթե մեր ժողովուրդը այսպես, բաց ձեռքերով կարողացավ տանել այսպիսի հիասքանչ հաղթանակ, ուրեմն թող մեր հարեւան պետությունը հասկանա, որ եթե մեր պետությունը մերկ ձեռքերով այսպես է անում, եթե զենք վերցնի՝ ինչեր կանի, ու թող մտքով չանցնի, որ էս կողմ անցնի: Այնպես, որ կուզեի վանկարկենք նաեւ «Ազատ, անկախ Արցախ»:

Հուզմունքս մեծ է, հիացմունքս անսահման, սերս՝ տիեզերական, սիրում եմ բոլորիդ իմ ընտանիքի նման» ,-ասաց Հայկ Մարությանը՝ կարգին Հայկոն: