Ինչպես տեսնում եք, Կարեն Կարապետյանի տեղը զբաղեցնում է իմ ուսապարկը. Փաշինյան

Ազգային ժողովի ԵԼՔ խմբակցության պատգամավոր Նիկոլ Փաշինյանը երեկ հրապարակից ՀՀ վարչապետի պաշտոնակատար Կարեն Կարապետյանին առաջարկեց հանդիպման գալ և բանակցել՝ ԶԼՄ-ների ներկայացուցիչների ներկայությամբ։ Այսօր Կարեն Կարապետյանը հանդիպման վայր չժամանեց և բանակցություններ չկայացան, փոխարենը Նիկոլ  Փաշինյանը լրագրողների հետ ասուլիս անցկացրեց․Ըստ Փաշինյանի՝ Կարապետյանի բացակայությունը նշանակում է, որ ՀՀԿ-ում խառը իրավիճակ է, քանի որ երեկ կամ առաջին օրը  նրանք հայտարարել էին, որ պատրաստ են առանց նախապայմանների բանակցությունների։

Պատգամավորի համոզմամբ՝  իրենց դիրքորոշումն այս հարցում պարզ է․ «Մենք այդ մասին արդեն խոսել ենք: Մենք կարծում ենք, որ այդ գործընթացում ժողովրդի տարած հաղթանակը պետք է հաստատվի նաեւ դե յուրե: Այսինքն՝ հարցը հետեւյալն է. արդյո՞ք Հայրապետական կուսակցությունը ցանկանում է լուծել այս ճգնաժամը: Եթե վարչապետ ընտրվի հանրապետական թեկնածուն, ապա այս ճգնաժամը չի լուծվի»,-ասաց պատգամավորը՝ ընդգծելով, որ կշարունակեն իրենց  գործողությունները։

 Փաշինյանը նաև ընդգծեց, որ Կարապետյանի՝ բանակցությունների չգալը ապացուցեց, որ նա, պարզապե,  վստահ չէ իր բանակցային ուժերի վրա: «Եվ եթե մի մարդ, որն այնքան էլ վստահ չէ իր բանակցային ուժերի վրա իր հայրենիքի ներսում, ինչպե՞ս է նա պատրաստվում բանակցել Ղարաբաղի հարցի շուրջ: Ի՞նչ... Մի՞թե մենք այսպիսի իրավիճակ ենք ունենալու հայ-ադրբեջանական բանակցություններում»,-ասաց նա՝ հավելելով, որ պարոն Կարապետյանի տեղը զբաղեցնում է այս պահին իր ուսապարկը:

Հարցին՝ ինչ են պատրաստվում անել մայիսի 1-ին, Նիկոլ Փաշինյանը պատասխանեց․«Ես մայիսի 1-ին կանխատեսում եմ Հայաստանի Հանրապետության հարյուր հազարավոր քաղաքացիներ Երեւանի փողոցներում: Մենք այս պահին կոչ ենք անում Հայաստանի բոլոր քաղաքացիներին մայիսի 1-ին առավոտյան ժամը 8-ին լիnել Երեւանում եւ հեղեղել Երեւանի փողոցներն ու հրապարակները՝ այդ թվում Ազգային ժողովի հարակից փողոցները եւ հրապարակները»: