Քոչարյանը՝ վարչապետի թեկնածո՞ւ. լուրջ չէ

Քաղբանտարկյալները, որոնք կան Հայաստանում, պետք է միանշանակ ազատ արձակվեն, այսօր լրագրողների հետ հանդիպմանը հայտարարեց ԱԺ պատգամավոր, «Իմ քայլը» շարժման ղեկավար Նիկոլ Փաշինյանը՝ պատասխանելով հարցին, թե «Սասնա Ծռերին» ազատելու որոշում կամ ինչ-որ այլ տարբերակ՝ դատական պրոցեսին միջամտելու, ունի՞ արդյոք Փաշինյանը։

«Թե ովքեր են քաղբանտարկյալներ, այդ հարցի լուծումը պետք է վերապահել մասնագիտացված հասարակական կազմակերպություններին, որոնք իրենց քննարկումների արդյունքում կգան ընդհանուր եզրակացության», -հայտարարեց Փաշինյանը։

Ընդհանուր առմամբ, նրա կարծիքով, պետք է անել ամեն ինչ՝ «հանրային համերաշխության մթնոլորտը վերականգնելու համար»։

Հարցին՝ իսկ «Սասնա Ծռերի» մասո՞վ, Փաշինյանը պատասխանեց. «Ես արդեն ասացի»։

Փաշինյանը նաև հավելեց, որ հույսը դնում է ժողովրդի դիրքորոշման վրա, եթե լինի ժողովրդի զանգվածային ճնշում, ապա ՀՀԿ-ն պետք է հաշվի նստի այդ իրողության հետ, եթե չլինի դա, ապա որևէ հույս չի կարող ունենալ։

Նիկոլ Փաշինյանը նաև հայտարարեց, թե ինքը ժողովրդական ճնշումը պատկերացնում է զանգվածային ցույցերով, պատգամավորներին զանգահարելով ու շրջափակումներով:

Ինչ վերաբերում է խոսակցություններին, թե չի բացառվում, որ ՀՀԿ-ի վարչապետի թեկնածուն կարող է լինել ՀՀ 2-րդ նախագահ Ռոբերտ Քոչարյանը, Նիկոլ Փաշինյանն ասաց, թե այդ խոսակցություններին լուրջ չի վերաբերվում։