Գանձակի ծնողներն այցելեցին առաջնագծում ծառայող իրենց զինվոր զավակներին

Գեղարքունիքի մարզի Գանձակ գյուղի 20 զինծառայողների ծնողներ եւ հարազատներ վերադարձան Արցախից՝ ավարտելով իրենց այցելությունը առաջնագծում ծառայող իրենց զինվոր զավակներին: Ինչպես «Արմենպրես»-ին տեղեկացրեց Գանձակի գյուղապետ Արմեն Պողոսյանը, ծնողներն առաջնագիծ են այցելել գյուղապետարանի նախաձեռնությամբ եւ միջոցներով, երկու միկրոավտոբուսով, ապրիլի 24-26-ի ընթացքում, ՀՀ Պաշտպանության նախարարության եւ Արցախի Հանրապետության Պաշտպանության բանակի հրամանատարության հետ համագործակցությամբ:

«Տարին երկու անգամ, գարնան ու աշնան ամիսներին, Գանձակի գյուղապետարանը կազմակերպում է զինծառայողների ծնողների եւ հարազատների այցելություն դեպի առաջնագիծ: Հերթական ուղեւորությունն Արցախ համընկավ Հայոց ցեղասպանության զոհերի հիշատակի օրվան:

Արցախ գալու ցանկություն էին հայտնել զինծառայողների ծնողները, ընտանիքի մյուս անդամները, ընդհուպ՝ տատ կամ պապերը:Առաջին կանգառը կատարեցինք Դադիվանքում՝ մոմավառությամբ ու աղոթքով հարգանքի տուրք մատուցելով Հայոց ցեղասպանության զոհերի հիշատակին:

Այնուհետ զինծառայողներին այցելողները բաժանվեցին երեք խմբի: Առաջին խումբը տեղավորվեց Մարտակերտում, երկրորդ խումբը՝ Ստեփանակերտում, եւ երրորդ խումբը՝ Հադրութում, որպեսզի հարազատները հասցնեին տեսակցել եւ հյուրանոցային պայմաններում 1 օր անցկացնել իրենց զինվոր զավակների հետ: Պաշտպանության բանակի հրամանատարությունն արեց ամենահնարավորը, որպեսզի ամեն ինչ կազմակերպվի հավուր պատշաճի՝ զինվորների տեղափոխման մասին ժամանակին հոգալը, պայմանավորված տեղում ծնողների եւ զավակների հանդիպումը, զինվորների վերադարձը դեպի իրենց ծառայության վայրեր:

Վերադարձին գանձակցի ծնողները հնարավորություն ունեցան այցելել նաեւ Արցախի մի շարք տեսարժան վայրեր: Նրանք անչափ ոգեւորված էին՝ տեսնելով, թե ինչ ապահովված պայմաններում է անցնում իրենց որդիների ծառայությունը, եւ հպարտ, որ հայրենի հողի պաշտպան զինվորներ են պարգեւել հայրենիքին: Տեղական բյուջեի միջոցներից մենք հատկացրել ենք մոտ 700 հազար դրամ, հաշվի առնելով, որ բանակ-հասարակություն կապի ամրապնդման համար շատ կարեւոր խնդիր ենք լուծում:

Հաջորդ տեսակցությունը կկազմակերպենք աշնանը, որպեսզի ապահովենք հերթական ամառային զորակոչի զինվորների եւ ծնողների տեսակցությունը»,-ներկայացրեց համայնքի ղեկավարը:

Խոսրով Խլղաթյան