Ճշմարտությունը Նիկոլ Փաշինյանի՝ «դիպլոմ» չունենալու մասին

Աստղիկ Ավետիսյանը գրում է.

Գուցե չգրեի այս մասին, բայց որոշ հանգամանքեր ստիպեցին: Նիկոլ Փաշինյանը շատ լավ ուսանող լինելուց զատ, մեզ համար կայացած, հեռանկարային ժուռնալիստ էր: Գառնիկ Անանյանն էլ Նիկոլին գովելուց միշտ ասում էր՝ իմ հայրենակիցն է, ու հաճախ էր աչք փակում Նիկոլի բացակայությունների վրա: Նիկոլի հետ ծանոթացրեց իմ կուրսեցի իջևանցի Աշխեն Բադիրյանը, մենք առաջին կուրսի ուսանողներ էինք ու արդեն թղթակցում էինք տարբեր թերթերի: Աշխենի հետ գնացինք «Լրագիր» թերթի խմբագրություն, որտեղ էլ Նիկոլը նայեց մեր նյութերը, որոշ ուղղություն տվեց ու պայմանավորվեցինք, որ եթե հետաքրքիր հոդվածներ ենք ունենում, անպայման բերում ենք խմբագրություն: Ի դեպ, թերթի խմբագիրը Հայկազ Ղահրիյանն էր, ով ասում էր , որ Նիկոլի անունը դեռ լսելու եք: Նիկոլը խմբագրությունում շատ զբաղված էր, նույնիսկ քննություններին չէր հասցնում գալ, ու դրան զուգահեռ անընդհատ քննադատության թիրախում էր պահում համալսարանը: Հիշում եմ, երբ լուրեր տարածվեցին, թե Նիկոլը դուրս է մնում համալսարանից՝ դասերին չմասնակցելու, քննություններ չհանձնելու համար, իրենց կուրսի մի քանի հոգի, այդ թվում և Գայանե Փայտյանը, ինչպես նաև մենք՝ փոքրերս, որ երկրորդ կուրսում էինք, սկսեցինք պայքարել Նիկոլի չհեռացման համար: Բոլորս միաբերան շեշտում էինք, որ Նիկոլը կարող է չգալ համալսարան, բայց լավ ժուռնալիստ է: Հետո պատրաստեցինք նամակ, որի տակ պետք է ստորագրեին ուսանողները, Նիկոլի կուրսից ոչ ոք չէր ստորագրել այդ նամակը, մի քանի հոգի երկրորդ և առաջին կուրսի ուսանողներ էինք... ու քանի որ ես էի նախաձեռնել ստորագրահավաքը հրավիրվեցի դեկանի, հետո՝ ռեկտորի մոտ և ստացա խիստ նկատողություն՝ իրավիճակը սրելու համար: Ասածս այն է, որ ամպագոռգոռ ելույթներ ունենալու ժամանակը անցել է, Նիկոլը բոլորիս համար լավ օրինակ էր, բայց նաև չմոռանանք համալսարանի ընձեռած հնարավորությունները, մեր մտածողության, մեր միջավայրի, մեր ճաշակի ու գիտելիքի ձևավորման դարբնոցը, որը ֆորմալ կրթական համակարգ է և իր պահանջներն ունի, իսկ ուսանողն էլ իր պարտականություններն ունի, չպետք է անտեսվի այդ հանգամանքը: Ես ուրախ եմ, որ իմ ուսանողներն այսօր հանդես են եկել բաց նամակով: Մի քանի օր առաջ ինքս էի մտածում, որ սա լավ առիթ է՝ հանձնել Նիկոլին իր վաստակած դիպլոմը: Քաղաքական առումով օգտագործել փաստարկը, թե Նիկոլը դիպլոմ չունի՝ հիմնազուրկ է: Այնպես որ, ես էլ ուսանողներիս կողքին եմ՝ եկեք հանձնենք Նիկոլին իր դիպլոմը, եթե չենք խախտում համալսարանի որևէ կանոնակարգ կամ ընթացակարգ: Ամեն առիթ մի օգտագործեք վարկաբեկելու ԵՊՀ-ին, բոլոր ոլորտների լավագույնները համալսարանականներ են, ու ես դրա համար հպարտ եմ: 
Հ.Գ. Ի դեպ, Աննայի հետ հենց այդ տարիներին մտերմացան ու կազմեցին իրենց հրաշալի ընտանիքը: