Սերժ Սարգսյանին պետք է հետևի ՀՀԿ-ն. Էդուարդ Զորիկյան

«Նիկոլ Փաշինյանը ժամ առ ժամ՝ հստակ գիտի ինչ պետք է անի և անում է: Ես կարծում եմ՝ միանձնյա նա այս շարժումը չէր կարող կազմակերպել, նա ունի թիմ, ուստի ես կուզեի դիմել ՀՀԿ-ին և ասել, որ նրանք անցնցում պետք է ապահովեն իշխանության անցումը ժողովրդին: Եթե նրանք փորձեն դիմել այլ քայլերի, ապա մենք կտեսնենք պատմության կրկնություն, երբ օրեր շարունակ հազարավոր մարդիկ փողոց դուրս եկան, մեքենաներ ջարդեցին, ինչից հետո Սերժ Սարգսյանն ասաց, թե սխալվել է»,-այսօր լրագրողների հետ զրույցում ասաց հեղինակ-կատարող Էդուարդ Զորիկյանը՝ շեշտելով, որ ելքն այսօրվա երիտասարդները գիտեն: 

Վերջինս  իշխանությունից հեռանալ չփորձող «Հանրապետական» կուսակցության անդամներին հիշեցրեց, որ Սերժ Սարգսյանն արդեն հայտարարել է, որ սխալվել է, ուստի վաղուց ժամանակն է ՀՀԿ-ի պաշտոնյաները հեռանան. «Նրանց լիդերն արդեն ասել է, որ սխալվել է: Հիմա եկել է պահը, որ հասկանան՝ իրենք իշխանություն չեն: Սերժ Սարգսյանն էլ էր Նիկոլ Փաշինյանին հիշեցնում յոթ-ութ տոկոսը ձայները, բայց հրաժարական տվեց, ես կարծում եմ, որ նույնը լինելու է ՀՀԿ-ականների հետ»,- ասաց  Զորիկյանը:

«Բոլոր նրանք, ովքեր ամեն երկրորդ նախադասության մեջ հիշատակում են Սահմանադրությունը, թող հիշեն, որ իրենցից ոչ ոք այդ Սահմանադրությամբ չի ընտվել»,-ասաց երգահանն՝ ի պատասխան այն դիտարկումներին, որ Նիկոլ Փաշինյանի պահանջը չի բխում Սահմանադրությունից և ստեղծված ներքաղաքական իրավիճակը պետք է հանգուցալուծել միայն Սահմանադրությամբ: 

Խոսելով Նիկոլ Փաշինյան-երրորդ ուժեր համագործակցության մասին՝ Զորիկյանը նկատեց, որ եթե նման բան լիներ, եթե Նիկոլ Փաշինյանի տակը կեղտ լիներ, ապա ժողովուրդը դա վաղուց կիմանար: