Դավիթ Հարությունյանի մոտ անձի երկվությո՞ւն է

Թավշյա հեղափոխության փաստացի հաղթանակից հետո, հանրապետական կուսակցությունում ավելացել է անձի երկվությամբ տառապողների թիվը: Բանն այն է, որ կառավարման երկար ու ձիգ տարիների ընթացքում Հանրապետական պաշտոնյաները հանդես էին գալիս տարատեսակ հայտարարություններով, որոնք այսօր բաց աչքերով և պարզ ճակատով հերքում են: Նրանցից մեկն էլ Դավիթ Հարությունյանն է: Միջազգային լրատվամիջոցների համար հրավիրված ասուլիսում ՀՀ արդարադատության նախարարի ժամանակավոր պաշտոնակատար Դավիթ Հարությունյանը հայտարարել է, որ իշխանության մոնոպոլացումը և ընդգծված ընդդիմության դերի թերագնահատումը եղել են իշխող Հանրապետական կուսակցության գլխավոր սխալները: «Կարծում եմ, որ հիմնական խնդիրը մեր՝ Հանրապետական կուսակցության կողմից չհասկացվածությունն է, մեկ քաղաքական կուսակցության՝ իշխանությունը մենաշնորհելու վտանգը: Սա մեր գլխավոր սխալն է, որը մենք ընդունում ենք»,- ասել է Հարությունյանը:

Շատ լավ է իհարկե, որ Հարությունյանը ընդունում է այս ակնհայտ փաստերը, սակայն մի՞թե այդ պայծառատեսությունը նրա վրա նոր է իջել: Ընդամենը ամիսներ առաջ Հարությունյանը վստահեցնում էր, որ նոր Սահմանադրության փոփոխությունը չի հանգեցնի իշխանության մոնոպոլիզացիային վարչապետի կողմից: Ասել է թե՝ Հանրապետական կուսակցության: Մի՞թե այն ժամանակ Հարությունյանը հավատում էր ինքն իր բերած փաստարկներին, երբ մեր և միջազգային հանրության աչքերին թոզ էր փչում, թե՝ Սերժ Սարգսյանի ասած՝ թղթերով ամեն ինչ նորմալ է: Կամ ՀՀԿ-ն ստում էր այն ժամանակ, և այնքան էլ անկեղծ չէր սահմանադրական կարգ փոխելու հարցում, կամ էլ՝ ՀՀԿ-ն այսօր քաղում է իր ինքնախաբեության դառը պտուղները: Դավիթ Հարությունյանին կարելի է նաև հարց ուղղել՝ իսկ մի՞թե այդ ռիսկերի մասին չէր նրան և իշխող քաղաքական ուժին ակնարկում ԵՄ դեսպան Պյոտր Սվիտալսկին, ում նույն Հարությունյանը գրեթե անարգանքի սյունին գամեց, դրա հետ մեկտեղ՝ այդ նույն սյունին գամելով նաև ՀՀ միջազգային վարկանիշը: Գուցե այն ժամանակ արժե՞ր լսել դրսից հնչող բարի խորհուրդները, եթե սեփական ժողովրդի ձայնը այդքան անլսելի և անհասանելի էր հանրապետականների համար:

Ստելլա Խաչատրյան