Մայիսի 2-ից հետո խաղը կբարդանա՞

Հանրապետական կուսակցությունը հայտարարել է, որ վաղը կայանալիք ՀՀ վարչապետի ընտրությանը սեփական թեկնածու չի առաջադրի: Սա, անշուշտ, ողջամիտ քայլ է՝ հաշվի առնելով, որ հակառակ պարագայում ներքաղաքական լարվածությունը Հայաստանում կհասներ գագաթնակետին՝ ունենալով ամենավտանգավոր դրսևորումները և հետևանքները: Սակայն սեփական թեկնածու չունենալը դեռ չի նշանակում, որ հանրապետականները պատրաստվում են հալած յուղի տեղ ընդունել Փաշինյանի վարչապետությունը և համագործակցել նրա հետ՝ կարծես ոչինչ էլ չի եղել: Հնարավոր է, որ Հանրապետականը Փաշինյանի համար պատրաստել է այսպես ասած՝ վերջին նվերը: Չի բացառվում, որ վաղը ՀՀԿ-ն մեկ մարդու պես քվեարկի ժողովրդի թեկնածուի՝ ասել է թե՝ Փաշինյանի օգտին: Սակայն դրանով իսկ Փաշինյանը կհայտնվի անչափ ծանր իրավիճակում:

Փաշինյանին վարչապետ ընտրելուց հետո առնվազն մեկ տարի որևէ մեկը չի կարող ՀՀ սահմանադրության 115-րդ հոդվածի 3-րդ կետի հիմքով՝ անվստահություն հայտնել նրան: Հետևաբար՝ Փաշինյանը ստիպված է լինելու աշխատել քաղաքական մեծամասնության հետ, որը ցանկացած պահի կարող է վիժեցնել վարչապետի ցանկացած նախաձեռնությունը, իսկ այս իրավիճակը հղի է արդեն լուրջ քաղաքական քաոսով, քանի որ Փաշինյանը զրկված է լինելու խորհրդարանական մեծամասնության վրա ազդեցության լծակներից: Այս պարագայում՝ Փաշինյանը դառնում է վարչապետ, սակայն իշխանությունը փաստացի մնում է ՀՀԿ ձեռքում: Հենց այս իրավիճակից խուսափելու համար է անհրաժեշտ օր առաջ անցկացնել արտահերթ խորհրդարանական ընտրություններ: Սա առաջին հերթին անհրաժեշտ է հենց ժողովրդին, որպեսզի իր թեկնածուն չմնա ժամանակավորի կարգավիճակում: Ի դեպ՝ ժողովրդի գործոնի մասին՝ հենց հայ հասարակությունն է, որ պետք է շարունակի ձեռքը պահել իրադարձությունների զարգացման զարկերակի վրա, թույլ չտալու համար իր իրավունքների, շահերի ոտնահարում: Հասարակությունը պետք է ստանձնի արբիտրի դերը և իր ձեռքում պահի իշխանությունների վերահսկման լծակները: Եվ եթե անգամ Փաշինյանը սխալվի՝ ժողովուրդը պետք է սաստի նաև իր թեկնածուին, ուղղորդելով նրան կայացնել միայն Հայաստանի պետականության և քաղաքացիների շահերից բխող քայլեր: Ամենակարևորը այսօր ժողովրդի՝ գործընթացից չանջատվելն է և նոր իշխանություններին ողջամիտ պրեսինգի տակ պահելը:

Ստելլա Խաչատրյան