Չառաջնորդվե՛լ անձնական, խմբային շահերով, դադարեցնե՛լ քաղաքական հին մեթոդներով զանազան սցենարների խաղարկումը

Մայիսի 1-ին Ազգային ժողովում, երբ խորհրդարանը վարչապետ է ընտրում, պաթետիկ ելույթ ունեցավ ընդդիմադիր ԵԼՔ խմբակցության պատգամավոր Արարատ Միրզոյանը:

Ի թիվս այլ ճոխ նախադասությունների՝ Արարատ Միրզոյանը քաղաքական վերջին իրադարձությունները որակեց  նաև ազգային զարթոնք:

«2018 թվականի մայիսի 1-ին այստեղ՝ ՀՀ ԱԺ-ում, պատիվ ունեմ ներկայացնելու համաժողովրդական շարժման, այդ համազգային զարթոնքի թեկնածուին՝ Նիկոլ Փաշինյանին, ՀՀ վարչապետի պաշտոնում: Թեկնածություն, որին ԱԺ-ում առաջադրել է ԵԼՔ խմբակցությունը և որի թեկնածությունը սատարելու մասին հայտարարել են «Ծառուկյան» դաշինք և ՀՅԴ խմբակցությունները և թեկնածուին առնվազն չխոչընդոտելու մասին հայտարարել է ՀՀԿ-ն»:

Արարատ Միրզոյանը ամենայն մանրամասնությամբ ներկայացրեց Նիկոլ Փաշինյանի կենսագրությունը, այնուհետև շեշտեց կառավարության գործառույթները՝

1. Համազգային քաղաքական համերաշխութուն:
2. Կառավարությունը պետք է ապահովի երկրի բնականոն գործունեությունը:
3. Պետք բարեփոխվի ընտրական համակարգը:
4. Արտահերթ խորհրդրանական ընտրությունների կազմակերպում, որոնք կլինեն իսկապես ազատ, իսկապես արդար, իսկապես ժողովրդավարական, որոնց արդյունքները իսկապես ոչ մի կասկած չեն առաջացնի ոչ մեկի մոտ:

Արարատ Միրզոյանը կոչ արեց պատգամավորներին՝ չառաջնորդվել անձնական, խմբային շահերով, դադարեցնել քաղաքական հին մեթոդներով զանազան սցենարների խաղարկումը և իբրև ժողովրդի մասին մտածող պետական այրեր՝ օգնել համատեղ ուժերով միասին  լավագույն հնարավորը քաղել մեր երկրի համար հիրավի պատմական և բացառիկ այս պատմական հնարավորությունից:

Նա կոչ արեց նաև կողմ քվեարկել Հայաստանի քաղաքացիների լիակատար աջակցությունը վայելող թեկնածուի՝ Նիկոլ Փաշինյանի օգտին: