ՍԴ դատավորի ընտրության քվեարկությունը կլինի վաղը և կանցկացվի գաղտնի

ՀՀ ԱԺ-ում Սահմանադրական դատարանի դատավորի ընտրության հարցի քննարկմանն առաջադրվել է Էմիլ Բաբայանի թեկնածությունը: 

«Ելք» խմբակցության պատգամավոր Արտակ Զեյնալյանն իր ելույթում նշեց, որ մասնագիտացված ավելի քան 32 կազմակերպություններ կոչ են հղել ԱԺ-ին և Նախագահին, որ այս պաշտոնում ընտրեն մեկին, ով ոչ միայն կունենա բարձր մասնագիտական գիտելիքներ, այլև կհամապատասխանի դատավորի չափանիշներին:

«Ուղղակիորեն նախատեսված չէ, որ նման մրցույթ պետք է իրականացվի, բայց խորհրդակցական ձևով նման մրցույթ անցկացնելը չի հակասի նպատակին, որին ձգտում ենք հասնել: Պետք է փոխել սկզբունքը և այս անգամ ՍԴ դատավոր ընտրել մասնագիտական խմբի կողմից ընտրված խմբի շարքից: Ես պատկերացնում եմ, որ մենք չենք քվեարկի այս թեկնածուի օգտին, և պարոն Բաբայանը կկարողանա մասնակցել այս մրցույթին, հույս ունեմ՝ կհաղթի և կներկայացվի ԱԺ-ին»,- ասաց նա՝ կոչ անելով հարգել ՀԿ-ների հորդորը և այս անգամ առաջնորդվել այդ սկզբունքով:

ՍԴ դատավորի թեկնածու Բաբայանը եզրափակիչ ելույթում հավաստիացրեց, որ նրանց կողմից վստահության արժանանալու դեպքում ՍԴ դահլիճ և փակ խորհրդակցական սենյակ է տանելու իր որդեգրած սկզբունքները, այն է՝ մարդու իրավունքների պաշտպանություն, ինքնիշխանություն և իրավական պետության կառուցման զարգացման անբեկանելի հավատ և դրանց նվիրվածություն:

Հարցի քննարկումից հետո Հաշվիչ հանձնաժողովի նախագահ ՀՀԿ քարտուղար Գագիկ Մելիքյանը տեղեկացրեց՝ ՍԴ դատավորի ընտրության քվեարկությունը տեղի կունենա վաղը՝ մայիսի 4-ին, ժամը 10:30-11:30-ը, ԱԺ նիստերի դահլիճի նախասրահում և կանցկացվի գաղտնի: