Դեսպան Սվիտալսկին դատարանում է. Անդրիաս Ղուկասյանն ազատ կարձակվի՞

Էրեբունի, Նուբարաշեն վարչական շրջանի առաջին ատյանի դատարանում այսօր ընթանում է քաղբանտարկյալ Անդրիաս Ղուկասյանի խափանման միջոցը փոխելու վերաբերյալ դատական նիստը: Նշենք, որ դատարանի դահլիճում է Հայաստանում ԵՄ դեսպան Պյոտր Սվիտալսկին։ Ղուկասյանի փաստաբանը դիմել է դատարան՝ պահանջելով փոխել իր պաշտպանյալի խափանման միջոց կալանքը։

Հետաքրքական է, որ դեսպանն անձամբ ներկա է դատավարությանը, որի ժամանակ որոշվելու է՝ Անդրիաս Ղուկասյանի խափանման միջոցը փոխել, թե՝ ոչ:

Նշենք, «Թավշյա հեղափոխության» առաջնորդ Նիկոլ Փաշինյանը՝ որպես նոր Կառավարության առաջնահերթություն՝ հատուկ ընդգծել է, որ պետք է հրատապ կարգով ազատ արձակվեն բոլոր քաղբանտարկյալները և դեսպան Սվիտալսկու մասնակցությունը կարելի է դիտարկել նաև այս համատեքստում: 

Հիշեցնենք, որ Ղուկասյանը «Ռադիո Հայ» ռադիոկայանի համահիմնադիրն է և արդեն 21 ամիս է՝  գտնվում է կալանքի տակ։

Նշենք, որ ըստ մեղադրանքի՝ Անդրիաս Ղուկասյանը 2016 թվականի հուլիսի 29-ին Երևանում զանգվածային անկարգություններ է կազմակերպել, ինչպես նաև փորձել է միանալ 2016 թվականի հուլիսի 17-ին Երևանի Խորենացի փողոցի 158 հասցեում տեղակայված՝ Հայաստանի ոստիկանության Երևանի վարչության պարեկապահակային ծառայության գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված, զինված խմբին, զինվել, ապօրինի կերպով հրազեն ու ռազմամթերք կրել, պահել և խմբի անդամների հետ համակատարմամբ շարունակել պահել զավթածն ու պատանդներին, սակայն հանցագործություններն ավարտին չի հասցրել իր կամքից անկախ հանգամանքներով: