Նիդեռլանդները ցանկանում է օրենքով արգելել երկրում թուրք քաղաքական գործիչների նախընտրական արշավները

Նիդեռլանդների վարչապետ Մարկ Ռյուտեի ղեկավարած «Հանուն ազատության և ժողովրդավարության» ժողովրդական կուսակցությունը (VVD) ցանկանում է օրենքով արգելել երկրում թուրք քաղաքական գործիչների կողմից նախընտրական քարոզարշավի անցկացումը: Այս մասին հայտնում է թուրքական T24 գործակալությունը:

Թուրքիայում հունիսի 24-ին արտահերթ նախագահական ու խորհրդարանական ընտրություններ անցկացնելու մասին որոշման հրապարակումից հետո Նիդերլանդները, Գերմանիան և Ավստրիան հայտարարել էին, որ իրենց տարածքում թույլ չեն տալու այդ թեմայով որևէ հանրահավաքի անցկացում:

Մարկ Ռյուտեի ղեկավարած կուսակցությունը սկսել է նախաձեռնություն հնարավոր քարոզարշավը պաշտոնապես Նիդեռլանդներում արգելելու նպատակով:

Կուսակցության պատգամավոր Բենտե Բեքերը նշել է, որ Նիդեռլանդներում քարոզարշավ անել ցանկացող թուրք քաղաքական գործիչները տեղի հասարակության շրջանում անհանգստություն են առաջացնում: Բացի այդ, նա ընդգծել է, որ Թուրքիայում նախընտրական շրջանի լարվածությունն ու հնարավոր բախումներն այդպիսով տեղափոխվում են Նիդեռլանդներ, ուստի անհրաժեշտ է իրավական առումով կարգավորել հարցը:

Ակնկալվում է, որ մյուս կուսակցությունները աջակցելու են VVD-ի առաջարկին՝ արգելելու երկրում թուրք գործիչների նախընտրական քարոզարշավը:

Թուրքիայում հունիսի 24-ին տեղի կունենան արտահերթ նախագահական ու խորհրդարանական ընտրություններ: Ընտրություններից հետո երկրում կառավարման խորհրդարանական համակարգից անցում կկատարվի նախագահական համակարգի: