Ազատ արձակել «Սասնա Ծռերին»

Այսօր Շենգավիթի դատարանում մեկնարկեց  «Սասնա Ծռերի» հերթական դատավարությունը։ 

«Սասնա Ծռերի» անդամ Վարուժան Ավետիսյանի պաշտպան Մուշեղ Շուշանյանը միջնորդություն ներկայացրեց՝ իր պաշտպանյալի նկատմամբ ԶԼՄ միջոցների հետ շփվելու արգելքի վերացման մասին:

Այս միջնորդությանը միացավ Վարուժան Ավետիսյանը և նշեց, որ երկրում իրողություն է փոխվել, սակայն ինքը շարունակելու  է պահանջել, որ ռեժիմի անդամները պատասխան տան իրենց կատարած չարագործությունների համար:

ԶԼՄ-ների հետ շփվելու արգելքի վերացաման համար միջնոդություն ներկայացրեցին նաև Պավլիկ Մանուկյանի պաշտպանները: «Ես բացելու եմ դավաճանների դիմակները: Պահանջում եմ, որ թույլ տաք շփվենք մամուլի հետ, երբ Դուք գնաք Ձեր մենաստանում հանգստանալու: Հուսով եմ, որ հետ գաք, կկայացնեք որոշում, որից հետո ես Ձեզ կասեմ՝ դատավոր Մակյան, ինչը մինչև հիմա չեմ ասել»,-նշեց Պավլիկ Մանուկյանը:

Փաստաբան Լուսինե Սահակյանը և Արայիկ Պապիկյանը ներկայացրին նաև միջնորդություն՝ «Սասնա Ծռերի» խափանման միջոցը փոխելու և ազատ արձակելու համար և խնդրեցին դատարանին՝ հաշվի առնել երկրում ստեղծված նոր քաղաքական իրավիճակը։

«Իրավական հիմնավորում ունի այս միջնորդությունը և այն առավել քան հստակ է։ Մահացել է այն վարչախումբը, որի դեմ պայքարել են այս անձինք, նման պարագայում թաքնվել ինչի՞ց, ռեժիմից, որն արդեն գոյություն չունի՞»,-ասաց «Սասնա Ծռերի» պաշտպաններից՝ Երվանդ Վարոսյանը։