Ազգը Ձեր կարիքն ունի, ազատությո՛ւն Սամվել Բաբայանին (լուսանկարներ)

«Հայաստանն առանց քաղբանտարկյալների» խորագրով բողոքի ակցիայի մասնակիցները վճռական են իրենց պահանջների մեջ և չեն պատրաստվում հեռանալ՝ մինչև որևէ պաշտոնյա չիջնի և ստույգ պատասխան չտա իրենց հարցերին։

 

ԼՈւՐԵՐ.com թղթակցի այն հարցին, թե վարչապետ Նիկոլ փաշինյանը երեկ կոչ էր արել  բոլոր անհնազանդության ակցիաները, գործադուլները, ճանապարհներ փակելը դադարեցնել, եւ բոլոր հարցերը քննարկել ինստիտուցիոնալ ձեւով՝ մասնակիցներից մեկն ասաց, որ որ իրենք վստահում են վարչապետին, սակայն նախկին իշխանություններից մնացած չինովնիկները վտանգավոր են, ուստի՝ իրենք կշարունակեն պայքարը։

Ակցիայի համակարգող՝ 7or.am-ի խմբագիր Անդրանիկ Թեւանյանը հայտարարեց, որ Վճռաբեկ դատարանը Սամվել Բաբայանի գործը չի ընդունում վարույթ եւ այս ակցիան նաեւ պահանջ է, որ ընդունեն վարույթ:

 

Ակցիայի համակարգող Անդրանիկ Թևանյանը հանդիպեց Վճռաբեկ դատարանի քրեական գրասենյակի պետ Արմեն Հարությունյանի հետ. պայմանավորվածություն ձեռք բերվեց այն մասին, որ երկուշաբթի՝ մայիսի 21-ին, հրապարակվելու է կոնկրետ օր, թե երբ է Բաբայանի գործը վարույթ ընդունվելու:

 

Անդրանիկ Թևանյանի խոսքով՝ եթե երկուշաբթի պատասխանը չլինի՝ նախաձեռնող խումբը հետագա գործողությունների մասով որոշում կկայացնի, իսկ այսօր նախազգուշական ակցիան համարվեց ավարտված: