Մանե Թանդիլյանը դեռ գրանցված է «Սինոփսիս Արմենիա»-ում և 500.000 աշխատավարձ է ստանում

ՀՀ աշխատանքի և սոցիալական հարցերի նախարար Մանե Թանդիլյանը մինչ պատգամավոր ընտրվելը երկար տարիներ աշխատել է «Սինոփսիս Արմենիա» ՓԲԸ-ի ֆինանսական տնօրենի տեղակալ, գլխավոր հաշվապահի պաշտոնում:

Թավշյա հեղափոխության հանրահավաքների ժամանակ այս ընկերության աշխատակիցները ևս մեծ աղմուկով միացան հանրահավաքներին: Նրանք գրասենյակի տարածքից հանել էին բոլոր այն լուսանկարները, որոնցում պատկերված էր Սերժ Սարգսյանը, թեպետ ընկերության տնօրենը սերտ հարաբերություններ ուներ Սերժ Սարգսյանի հետ և Երևանի ավագանու ՀՀԿ խմբակցության անդամ է:

Հավանաբար, բողոքի ակցիաների կազմակերպան գործում մեծ է եղել Մանե Թանդիլյանի ազդեցությունը, ով մինչ այսօր էլ չի դադարում այդ ընկերությունում հեղինակություն մնալ:

ԼՈւՐԵՐ.com-ի տեղեկություններով, Մանե Թանդիլյանը մինչ օրս պայմանագրային հիմունքներով աշխատում է այդ ընկերությունում և ստանում 500.000 դրամ աշխատավարձ:

Նշենք, որ պատգամավորը, նախարարը չեն կարող զբաղեցնել իրենց կարգավիճակով չպայմանավորված պաշտոն պետական կամ տեղական ինքնակառավարման այլ մարմիններում, որևէ պաշտոն` առևտրային կազմակերպություններում, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից:

ԼՈւՐԵՐ.com-ը հարցի առնչությամբ փորձեց տեղեկություն ստանալ նաև տնօրեն Հովիկ Մուսայելյանից, սակայն վերջինս ասաց, որ հանձնաժողովի նիստի է, ինչը դեռ մի քանի ժամ կտևի: 

Ավելի ուշ Մանե Թանդիլյանը նամակով պատասխանել է խմբագրությանը, որով հայտնում էր, թե ինքը ՀՀ ԱԺ պատգամավոր ընտրվելուց հետո օրենքով սահմանված կարգով խզել եմ աշխատանքային պայմանագիրը և չի հանդիսանում այդ ընկերության աշխատակից։ Այնուհետև ստանալով առաջարկ կատարել է որոշակի կրթական աշխատանք, օգտվել է Սահմանադրության 95-րդ հոդվածով  նախատեսված դասավանդելով միջազգային ստանդարտներ, այն էլ ընդամենը 4-5 ամիս։