«Ամուլսարն առանց հանքի». բողոքի ակցիայի մասնակիցները նամակ են փոխանցում Նախագահին (թարմացված)

Ամուլսարի ոսկու հանքի շահագործման դեմ բողոքի ակցիաները չեն դադարում: «Ամուլսարն առանց հանքի» հավաքի մասնակիցներն այս պահին Մաշտոցի պուրակից խաղաղ երթով շարժվում են դեպի նախագահի նստավայր՝ Արմեն Սարգսյանին հանձնելու նամակը:

«Մենք բոլորս միասնաբար մեր երկիրը հանքարդյունաբերական հենք ունեցող երկրից պետք է վերածենք բնապահպանական հենք ունեցող կայուն զբոսաշրջության վրա կառուցվող երկրի։ Պարո՛ն Նախագահ, մեր ժողովուրդը խոհեմ է, գիտի ե՛րբ ըմբոստանալ, ե՛րբ լինել համբերատար և լուռ։ Այս նամակում տեղ գտած փաստերը լիովին թույլ են տալիս ժողովրդին առնվազն ժամանակավոր կասեցնել հանքի շահագործումը։ Կատարե՛ք Ձեր քայլը․․․»,- ասվում է նամակում:

Ակցիայի մասնակիցները պնդում են՝ Ամուլսարը պետք է սար մնա. «Մենք պետք է փրկենք Ամուլսարը: Սա վճռական պահ է, Ամուլսարի պահպանման համար շուրջ 7 տարի շարունակվող պայքարում: Այս պայքարը չենք կարող թողնել միայն Ջերմուկի, Գնդեվազի ու Կեչուտի բնակիչների ուսերին: Կոչ ենք անում, որ ամբողջ Հայաստանի բնակիչները մասնակցեն ու աջակցեն այս պայքարին, որպեսզի միավորենք ուժերը և ի վերջո վերջնականապես դադարեցնենք Ամուլսարում ոսկու արդյունահանման ապօրինի, խիստ վտանգավոր ծրագիրը»,- ասաց բողոքի ակցիայի մասնակիցը:

Նշենք, որ արդեն 4-րդ օրն է, ինչ Ջերմուկ, Կեչուտ և Գնդեվազ գյուղի բնակիչները փակել են դեպի ոսկու հանք գնացող ճանապարհները՝ թույլ չտալով հանքի մեքենաների տեղաշարժը, որի արդյունքում հանքի աշխատողները չեն կարողանում մեկնել աշխատավայր:

Հավելենք՝ Ամուլսարի ծրագիրն իրականացնում է «Լիդիան Արմենիա» ընկերությունը:

14:20

Քիչ առաջ Նախագահ Արմեն Սարգսյանը հանդիպեց «Ամուլսարն առանց հանքի» նախաձեռնության մասնակիցների հետ, ովքեր գնացել էին նամակ հանձնելու Նախագահին:

Ցուցարարները վերջինիս դիմավորեցին ծափահարություններով: Նրանք ներկայացրին նամակի բովադակությունը՝ հույս հայտնելով, որ արձագանքը երկար սպասեցնել չի տա: Արմեն Սարգսյանն էլ իր հերթին խոստացավ հետամուտ լինել խնդրին: