ԿԲ որոշ պաշտոնյաների աշխատավարձն ավելի բարձր է, քան Նախագահինն ու վարչապետինը. Բագրատյանը՝ ԿԲ նախագահին

«Ծառուկյան» խմբակցության պատգամավոր Սերգեյ Բագրատյանը ԿԲ նախագահից հետաքրքրվեց, թե որքան են նրա տեղակալների և խորհրդի անդամների աշխատավարձերը, քանի որ ինքը մտահոգությւն ունի, որ դրանք կարող են ավելին լինել, քան Հանրապետության նախագահինն ու վարչապետինը։

«Կխնդրեի, որ ներկայացնեք ԿԲ նախագահի տեղակալաների և խորհրդի անդամների աշխատավարձի չափը», - ԿԲ նախագահ Արթուր Ջավադյանին դիմելով՝ ասաց պատգամավորը։ 

Բագրատյանի հարցին ի պատասխան ԿԲ նախագահը նշեց՝ հայտարարագրերը ներկայացված են էթիկայի հանձնաժողովում և դրանք կհրապարակվեն. «Մեր աշխատավարձերը վերջին տարիներին կտրուկ փոփոխության չեն ենթարկվել։ Հենց ԱԺ ամբիոնից որոշված է «Բանկերի և բանկային գործունեության մասին օրենքով», որ մեր աշխատավարձերը պետք է ավելի ցածր չլինեն, քան բանկային համակարգի միջինը, բայց մերը բավականին ցածր է բանկային համակարգից: Մենք ոչ թե խախտում ենք օրենքը, այլ աշխատում ենք դա չանել»,-պարզաբանեց Ջավադյանը։

Բագրատյանն ընդգծեց՝ օրենքը սահմանում է ցածր շեմը, մինչդեռ բարձր շեմի սահմանի մասին չի խոսվում. «Ինձ ավելի հետաքրքրում է, թե որքան է բարձր շեմը։ Իմ տվյալներով՝ դրանք ավելի բարձր են, քան Նախագահի ու Վարչապետի աշխատավարձերը», - ասաց Բագրատյանը՝ նշելով, որ իրեն հենց սա է մտահոգում։

Սրան ի պատասխան Ջավադյանը շեշտեց՝ խոսքը աստղաբաշխական մեծ թվերի մասին չէ. «Հնարավոր է՝  բարձր լինի որոշ պետական գործիչներից, բայց դա աշխարհում ընդունված է»։