ԱԻՆ կադրային քաղաքականությունը կփոխվի. առաջնահերթությունը կտրվի ՃԿՊԱ լավագույն շրջանավարտներին

ՀՀ արտակարգ իրավիճակների նախարար Հրաչյա Ռոստոմյանը մայիսի 23-ին այցելել էր ՀՀ ԱԻՆ Ճգնաժամային կառավարման պետական ակադե­միա (ՃԿՊԱ): Կրթօջախի գործունեությանը նախարարին ծանոթացրեց ՃԿՊԱ ռեկտոր, փ/ծ գեներալ-մայոր Հ. Մաթևոսյանը: 

Նախարարին ներկայացվեցին ակադեմիայի տեխնիկական հագեցվածությունը՝ փրկարարական գույքն ու սարքավորումները, փրկարարների վերապատրաստման համար նախատեսված տեխնիկական միջոցները, արագ արձագանքման փրկարարական գույքը և այլն: 

Ինչպես տեղեկացրին ՀՀ արտակարգ իրավիճակների  նախարարության տեղեկատվության և հասարակայնության հետ կապերի վարչությունից,ԱԻ նախարարը շրջեց ԲՈՒՀ-ի դասասենյակներով, մասնագիտական՝ «Հրդեհային պաշտպանու­թյուն», «Փրկարարական գործ», առաջին բուժօգնության և խաղարկային լսարաններով, ծանոթացավ ՃԿԱԿ կարգավար-օպերատորների վերապատրաստման համար նախատեսված հատուկ լսարանի հնարավորություններին և եղավ ակադեմիայի գրադարանում: Այն հագեցած է համակարգչային տեխնիկայով, գործում է նաև էլեկտրոնային գրադարան: ՃԿՊԱ ռեկտոր Հ. Մաթևոսյանի խոսքով՝ լայնածավալ աշխատանք է տարվում հանրության շրջանում անվտանգության մշակույթի ձևավորման ողղությամբ: Գրադարանի նյութերը նախատեսված են մանկապարտեզի երեխաներից մինչև ԲՈՒՀ-ի ուսանողների համար՝ ներառյալ մեթոդաբանությունը և ներառական ծրագրերը: 

ՀՀ ԱԻ նախարար Հ. Ռոստոմյանը հանդիպեց նաև ՃԿՊԱ աշխատակիցների և դասախոսական անձնակազմի հետ: Նախարարին ներկայացվեցին ԲՈՒՀ-ի առաջնային հրատապության և գերակա խնդիրները: Դրանք հիմնականում առնչվում էին տեխնիկական հագեցվածության, օրենսդրական բարեփոխումների, անձնակազմի սակավության և հանրապետության տարբեր կրթօջաններում պլանավորված կրթական ծրագրերի իրականացման հետ: 

Ողջունելով ակադեմիայի անձնակազմին՝ նախարար Հ. Ռոստոմյանը նշեց, որ լրջագույն փոփոխություններ են նախատեսվում ԱԻ նախարարության կադրային քաղաքականությունում:

«Յուրաքանչյուր տարի ակադեմիան շուրջ 200 շրջանավարտ է տալիս, սակայն ըստ մեր ունեցած վիճակագրության՝ նախորդ տարիներին նրանցից միայն մեկ կամ երկու հոգի է նախարարությունում ընդունվել աշխատանքի: Այս թվերը, մեղմ ասած, գոհացուցիչ չեն: Այսուհետև առաջնահերթությունը կտրվի ակադեմիայի լավ և գերազանց առաջադիմություն ցուցաբերած շրջանավարտներին»,- ասաց Հ. Ռոստոմյանը: 

Նախարարը նշեց նաև, որ աշխատակիցների կողմից բարձրաձայնված խնդիրները կուսումնասիրվեն և կլուծվեն հրատապ կերպով շատ մոտ ապագայում: 

Նշենք, որ Ճգնա­ժա­մային կառավարման պետական ակադեմիան ստեղծվել է 1992 թ.: Այն կրթական ու գիտական պետական բարձրագույն ուսումնական հաստատություն է, որի գործունեությունը նպատակաուղղված է քաղաքացիական պաշտպանության, արտակարգ իրավիճակներում բնակչության պաշտպանության բնագավառում կրթական, գիտական, մեթոդական, փորձագիտական, հրատարակչական աշխատանքների և ուսումնառության իրականացմանը: Ակադեմիան իրականացնում է միջին և բարձրագույն մասնագիտական կրթության երեք հիմնական կրթական ծրագրեր՝ մասնագետի, բակալավրի ու մագիստրոսի որակավորման աստիճանների շնորհումով: Կազմակերպվում են հանրապետության կառավարման մարմին­ների ղեկավար կազմի և մասնագետների վերա­պատ­րաստ­­ման դասընթացներ: