Մերժվածը. «Զղջումագիր» գրեց, սակայն ՀՅԴ-ն չներեց. «Հրապարակ»

«Հրապարակ» թերթը գրում է․

Քաղաքական իրադարձություններից հետո «Ելք» խմբակցությունը համալրած նոր պատգամավոր Հովիկ Աղազարյանից հետաքրքրվեցինք՝ ինչպե՞ս հեռացավ ՀՅԴ-ից եւ հայտնվեց «Քաղաքացիական պայմանագրում», մանավանդ որ «նախկին դաշնակ չի լինում»։ Աղազարյանը վստահեցրեց, որ գաղափարական դիսկոմֆորտ չի զգացել ու չի զգում։

«Եթե առիթ լինի, ու ծանոթանաք ՀՅԴ-ի ու «ՔՊ»-ի ծրագրերին, կտեսնեք, որ չնչին է տարբերությունը։ Ընդ որում՝ այն բաները, որ պետք է ես անեի ՀՅԴ-ում, այժմ արվում է «ՔՊ»-ի կողմից։ Միակ դիսկոմֆորտն այն էր, որ երիտասարդ թիմ է, բայց դա շուտ հաղթահարվեց, երբ միասին գնացինք Ղարաբաղ, քայլեցինք»,- ասաց 58-ամյա Աղազարյանը։

Մանե Թանդիլյանին փոխարինելու եկած պատգամավորը 1990-1995 թթ. առաջին գումարման Գերագույն խորհրդի պատգամավոր է եղել, ընդ որում՝ ՀՅԴ խմբակցության քարտուղար: 1996թ. ՀՅԴ գերագույն մարմնի նախագահն էր: 1998-ին հեռացվել է ՀՅԴ-ից, իր խոսքով՝ քաղաքական դիրքորոշման հարց է եղել․ «Չար տղա էի, մեկ-մեկ չէի լսում կուսակցությանը»։

Հետագայում «զղջումագիր» է գրել, բայց դա էլ չի «փրկել» նախկին ՀՅԴ-ականին՝ նրան չեն վերականգնել կուսակցությունում։ Կուսակցությունից հեռացվելուց հետո նա սոցիալական պայմանների բերումով լքել է Հայաստանը եւ 10 տարուց ավելի ապրել Սանկտ Պետերբուրգում։

«Վերադարձա եւ 2013-ին առաջադրեցի նախագահի թեկնածություն, գիտեի, որ ցենզս չի բավարարում, բայց ուզում էի ուշադրություն հրավիրել ինձ վրա, նորից քաղաքականություն էի ուզում վերադառնալ»,- անկեղծացավ նա։ Ընկերների խորհրդով ծանոթացել է Փաշինյանի հետ, «հավանել» նրա գաղափարները, 2015 թվականից «ՔՊ», իսկ 2016-ից՝ «ՔՊ» վարչության անդամ է:

Առավել մանրամասն՝ թերթի այսօրվա համարում: