Անօրինություն և վանդալիզմ «Թերլեմեզյան»-ի քոլեջում

«Թերլեմեզյան restart»-ն օրեր առաջ, հավաստի աղբյուրից ստացել է տեղեկություն՝  գեղարվեստի պետական քոլեջում նախկինում կայացած կոռուպցիոն գործարքի մասին, որը դրսևորվել է կաշառքի տեսքով: Աղբյուրը կոռուպցիոն գործարք իրականացնելու մեջ մեղադրում է քոլեջի ներկայիս փոխտնօրեն, դասախոս` Աշոտ Մարտիրոսյանին: Այս մասին տեղեկանում ենք «Թերլեմեզյան restart»-ի ֆեյսնուքյան էջից: 

 

ԼՈւՐԵՐ.com-ի թղթակցի հետ զրույցում «Թերլեմեզյան» քոլեջի նախկին ուսանող Փայլակ Թևանյանը նշեց, որ իրենք անանուն հաղորդագրություն էին ստացել, որ քոլեջում գործում է կահույքի արտադրամաս, այսօր արդեն հաջողվել է պարզել, որ իսկապես կա նման բան: 

 

Նշենք, որ երեկ ուսանողները քոլեջի շենքում հայտնաբերելով անօրինական գործող կահույքի արտադրամասը, փակել են արտադրամասի մուտքը՝ պահանջելով բացել արտադրամասի դռները, որպեսզի ֆիքսեն ապօրինի հաստատությունը: 

«Դեռևս 2012 թ. նախկին տնօրենի ժամանակավոր պաշտոնակատարը հայտարարել էր, որ այնտեղ անօրինական արտադրամաս է գործում։ Քոլեջի ներկայիս և նախկին ուսանողներս որոշեցինք գնալ և ստուգել, սակայն մեր առջև դուռը փակված էր: Փոխտնօրենն ասաց, որ տնօրենը հրահանգել է այդ դուռը չբացել։ Որոշեցինք դռան դիմաց նստացույց անել՝ դուռը բացելու պահանջով»,- ասաց քոլեջի նախկին ուսանողը։

 

«Ներսում հայտնաբերեցինք նաև դեռ չավարտված վիճակում գտնվող խոհանոցային կահույք, նույն կահույքից կտորներ։ Տնօրենը մեկնաբանեց, թե իբր դա իր ընկերուհու նվերն է, վերջինս իր բնակարանի համար գնած կահույքը չի հավանել բերել դրել են այդ սենյակում հետագայում այդտեղ բուֆետ սարքելու նպատակով։ Զավեշտալին այն է, որ տնօրենն ասաց, թե կահույքի կտորները ևս ընկերուհին նվիրել է իրեն»,- նշեց նա:

 

Փայլակ Թևանյանի խոսքով՝ բացի այդ ականատես են եղել վանդալիզմի, որը չի հերքել նաև տնօրենը. «Ուսանողների դիպլոմային աշխատանքներն անօրինական կերպով պահվում են քոլեջում, դրանք չեն տրվում ուսանողներին: Իսկ այդ դեպքում տնօրինությունը պետք է հոգա տվյալ նկարի ծախսերը, ինչն այս դեպքում չի եղել: Քանի որ «Թերլեմեզյան»-ի արխիվը այդ նույն նկուղային հարկում էր գտնվում, մենք տեսանք, որ գրեթե բոլոր նկարները վնասված են, մի մասը հանված էր, ըստ երևույթին այլ կառույցների տալու նպատակով՝ առանց տերերի հետ համաձայնեցնելու: Ամենացավալին այն է, որ տնօրինությունը մեկնաբանեց, թե նկարները բարեգործական նպատակով բաժանում են իբր անապահով ուսանողներին, որ վրայից նկարեն»,- մեզ հետ զրույցում իր մտահոգությունը հայտնեց նախկին ուսանողը: