Ալավերդցիները վախենում են Դեբեդ գետի համար

Տևական ժամանակ է՝ Ալավերդում  քաղքացիական շարժում է սկսվել Դեբեդ գետի վրա կառուցվող  «Շնող» ՀԷԿ-ի ակնկալվող շինարարական աշխատանքների դեմ: Տեղացիները համայնքային ակտիվ խումբ են ստեղծել՝ կազմակերպում են հանդիպումներ, քննարկումներ: Թեպետ ալավերդցիները ողջունում են հնարավոր աշխատատեղերի ստեղծումը, սակայն վախենում են Դեբեդ գետին սպառնացող էկոլոգիական աղետից:  Ակնկալվում է, որ ՀԷԿ-ի շինարարական աշխատանքերը կսկսվեն մի քանի ամսից:

Շարժման մասնակիցներն իրենց խնդրով դիմել են Ալավերդու ավագանուն, իսկ ավագանու անդամները, իրենց հերթին, դիմել են համայնքապետին՝ Սասուն Խեչումյանին: Վերջինիս գլխավորությամբ տեղի է ունեցել ավագանու արտահերթ նիստ, որի ընթացքում քննարկվել է ավագանու ուղերձը՝ վարչապետ Նիկոլ Փաշինյանին, որտեղ խնդրվում է չեղարկել ՀԷԿ-ի կառուցումը:

Ալավերդցիների հետագա անելիքները պարզելու համար  ԼՈւՐԵՐ.com-ի թղթակիցը զրուցեց  համայնքապետի հետ: «Կարծում եմ՝ անհրաժեշտ է մասնագիտական մոտեցում. որևէ ֆիզիկական անձ չի կարող չափել հասցվող վնասը: Ավագանին իր ուղերձով ներկայացրել է ռիսկերը, և մենք ակնկալում ենք մասնագիտական պատասխան ստանալ: Այս պահին դեռ ՀԷԿ-ը չի աշխատում՝ մենք ընդամենը ռիսկերն ենք գնահատել: Իհարկե, ակնկալում ենք իշխանություններից հնարավորինս արագ ստանալ հուզող հարցերի պատասխանները: Այս հարցում մեր դիրքորոշումն առայժմ սպասելն է»,-նշեց Ալավերդու համայնքապետ Սասուն Խեչումյանը: