Ինչպես է Նունե Եսայանը տիրացել Ջրվեժի տանը. երգչուհու պարզաբանումը

Այս ձնագունդը տարիների պատմություն ունի և ժամանակն է, որ այն հալվի: Այս մասին այսօր լրագրողների հետ զրույցում ասաց երգչուհի Նունե Եսայանը՝ անդրադառնալով վերջին օրերին իր հասցեին հնչող մեղադրանքներին: Բանն այն է, որ փաստաբան Դավիթ Ասատրյանը նամակ էր հրապարակել՝ ըստ որի՝ երգչուհին անօրինական ձևով տիրացել է Ջրվեժում գտնվող մի տան:

«Հարազատ մարդ 5 տարի առաջ խնդրեց, որ ես երաշխավոր կանգնեմ իրեն բանկում: Ես վստահելով՝ արեցի դա: Մի քանի ամիս վճարեց գումարները, որից հետո դադարեց դա անել: Բանկն ավտոմատ տոկոսները սկսեց գանձել իմ անձնական հաշվից, դա էլ մի քանի ամիս տևեց և ես բանկից խնդրեցի լուծում տալ խնդրին: Լուծումն էլ հետևյալն է՝ կամ տունը մնում է բանկին և վաճառում է, կամ վճարելով ամբողջ գումարը՝ գնում  եմ տունը: Ես ընտրեցի երկրորդ տարբերակը, որպեսզի հարազատներս չզրկվեն տնից, այն ենթադրությամբ, որ կհատուցեն ինձ, բայց դա տևեց 5 տարի: Ես, խորհրդակցելով իրավաբաններիս հետ, որոշեցինք դիմել իրավապահներին, որպեսզի նրանք տնից դուրս գան և ես կարողանամ վաճառել այն»,- պարզաբանեց Նունե Եսայանը: 

Նրա խոսքով՝ շուտով նամակը հրապարակողների կողմից կլինի հերքում, քանի որ նրանք հասկացել են, որ սխալ են վարվել իր նկատմամբ: 

Նունե Եսայանը պարզաբանեց՝ խոսքը քրոջ փեսայի մասին է. «Սա հատուկ արված շանտաժ է, այդ մարդիկ շահարկելով «Նունե Եսայան» անունը, փորձել են պահել իրենց տունը»,- նշեց նա:

Մեղադրող կողմի փաստաբան Դավիթ Ասատրյանը նամակ է հրապարակել.

«90-ամյա Ա. Անտոնյանը իր ընտանիքի անդամների հետ բնակվում է մինչ օրս ՀՀ Կոտայքի մարզ գ․ Ջրվեժ, 7-րդ փողոց 14 տուն հասցեում՝ սկսած 1970թ․-ից։ Հիշյալ տունը կառուցել է Ա. Անտոնյանի ընտանիքը։ Ա. Անտոնյանը մոլորության մեջ 2010թ․-ին շինծու գործարքների հիման վրա բնակարանը օտարել է իր թոռանը՝ Կ․ Կ-ին, իսկ այնուհետև այդ տունը անցել է Նունե Եսայանի սեփականությանը։ Այդ շինծու գործարքներին մասնակից է եղել նաև Ն. Եսայանը»,- ասված է փաստաբանի նամակի մեջ: