Մեկ-երկու հրաժարկանով բեկումնային փոփոխություններ չեն լինի․ փաստաբան
Ինչպես տեղեկացրել ենք, օրեր առաջ ՀՔԾ պետի պաշտոնից ազատվեց Վահրամ Շահինյանը, դրան հաջորդեց ՀՀ Քննչական կոմիտեի նախագահ Աղվան Հովսեփյանի հրաժարականի դիմումը։ Իսկ արդեն հունիսի 11-ին Շահինյանի պաշտոնում նշանակվեց Սասուն Խաչատրյանը։ Թե ինչ փոփոխությունների կբերի իրադարձությունների նման զարգացումը դատաիրավական համակարգում, ԼՈւՐԵՐ․com-ի թղթակիցը մասնագիտական կարծիք լսեց փաստաբան Հովհաննես Չամսարյանից։
-Պարո՛ն Չամսարյան, ինչպե՞ս կանդրադառնա ՀՀ դատաիրավական համակարգի վրա Աղվան Հովսեփյանի հրաժարականը:
-Չեմ կարծում, որ Աղվան Հովսեփյանի հրաժարականն ինքնին ունակ է մեծ փոփոխություններ բերել դատաիրավական համակարգում։ Այս համակարգում փոփոխություններ տեսնելու համար մեկ-երկու պաշտոնատար անձանց հրաժարականով և նորերի նշանակումներով բեկումնային փոփոխություններ չեն լինի, սակայն դրական եմ գնահատում այն, որ տևական ժամանակ՝ պետության համար կարևոր և պատասխանատու պաշտոններում հնարավորություն է առաջացել տեսնել նոր մասնագետների, որոնք իրենց հետ կարող են բերել նոր մոտեցումներ և կառավարման մեխանիզմներ։
-Աղվան Հոսեփյանն իր հայտարարության մեջ շեշտադրում է իր 45 տարիների փորձի, ոլորտում դրած ավանդի մասին։ Իրո՞ք այդ փորձն ու գիտելիքները ծառայել են ոլորտում դրական փոփոխություններ մտցնելուն։
-Աղվան Հովսեփյանի պաշտոնավարման տարիները աչքի են ընկել քննչական մարմինների ակնհայտ անհիմն գործելաոճով, անհիմն ձերբակալումներով, ապօրինի կալանավորման միջնորդություններ դատարան ներկայացնելով և այլն։ Շատ ավելի լավ կլիներ, որ այդ փորձը ծառայեցվեր նմանատիպ իրավիճակները վերացնելու ուղղությամբ։
-Անդրադառնանք նաև մյուս հրաժարականին՝ ՀՔԾ պետ Վահրամ Շահինյանին, ում փոխարինելու եկավ Սասուն Խաչատրյանը։ Ի՞նչ ակնկալիքներ ունենալ։
-Առանձնակի եմ կարևորում Հատուկ քննչական ծառայության դերը, քանի որ այն իրապես ունակ է լինել այն գործիքը, որի միջոցով մեր հասարակության մեջ առկա արատավոր մի շարք երևույթներ, մասնավորապես, կոռուպցիան և ընտրական գործընթացներում տեղի ունեցող հանցագործությունները, կարող են արմատախիլ արվել։ Այն փաստը, որ Սասուն Խաչատրյանը վերջին մի քանի տարիներին եղել է համակարգից դուրս, գտնում եմ, որ ավելի դրական է ներկա իրադրության պայմաններում, քան՝ եթե նշանակումը լիներ ներսի կադրերից։ Հույս ունեմ, որ վերջինս ավելի օբյեկտիվորեն կարող է վերլուծել ՀՔԾ համակարգային խնդիրները և ապահովել դրա առավել արդյունավետ աշխատանքը՝ հաշվի առնելով նաև վերջին քաղաքական փոփոխությունների արդյունքում ստեղծված և հնարավոր ակնկալվող իրադարձությունները։
-Արդյոք պաշտոնատար անձանց վերջին շրջանի հրաժարականներով կլուծվե՞ն այն բոլոր խնդիրները, որոնք ազդում են իրավական պետություն ունենալուն։ Հարկ չկա՞, որ հրաժարական տված պաշտոնյաները, որոնցից շատերին հանրությունը մեղադրում է տարատեսակ մութ գործերի մեջ, օրենքի առաջ պատասխանատվություն կրեն։
-Հրաժարականների փուլը միգուցե դեռ որոշ ժամանակ շարունակվի՝ հաշվի առնելով այն, որ հնարավոր են դեպքեր, երբ անձինք նոր ղեկավարների կամ նոր կառավարման ձևաչափերում իրենց այնքան էլ հարմար պայմաններում չզգան։
Ինչ վերաբերում է հասարակության կողմից պաշտոնատար անձանց մեղսագրվող արարքներին, ապա կարծում եմ, որ ՀՔԾ, ինչպես նաև այլ իրավասու պետական մարմինները, յուրաքանչյուրն իր իրավասության սահմաններում, պարտավոր է հետևողական և օբյեկտիվ վերաբերմունք ցուցաբերել ցանկացած հիմնավոր կասկածի առնչությամբ և առանց որևէ կաշկանդվածության գործել՝ հօգուտ հանրային շահի և օրինականության վերականգնման՝ ամրապնդելով հասարակության մեջ արդարության նկատմամբ հարգանքը և հավատը։
Լիլիթ Հակոբյան
ՈՒՂԻՂ ԵԹԵՐ
Ամենադիտված 
Իշխանությունը կասկածում է Վանաձորի քաղաքապետի պաշտոնակատար Ակային. «Հրապարակ»
